美股跌浪初期，港股相對美股硬淨，但係當美國減息半厘後，恒指開始頂唔住，其中一個原因係美債孳息率跌到唔識停，拖累香港銀行股全體單邊下
挫，令淡友優勢增加，而周五港股沽空比率升至16.7%，相當接近2月28日嘅17%高位。
回顧返2月28日嘅高沽空比率之後，下個交易日恒指低開後倒升，但強咗4個交易日後，星期五宣告挾淡倉失敗，好友再退守。星期五收市後最大利淡因素，莫過於歐美疫情加劇，確診數字大增，全球確診數字（除中國外）喺過去一星期激增逾兩倍，逼到意大利要封省，相信大家會驚埋美國，周一開市可能比周五黑期嘅逾300點跌幅跌得更多。
歐美疫情惡化，未算突如其來，星期一裂口低開之後，大家要驚嘅亦已反映出嚟。市場遊資充裕，如冇突如其來的負面消息，環球股市出現失控式下跌，機會較微。星期一開市後，關鍵將會係美債孳息率，近期跌幅一日比一日大，如果去到反彈臨界點，加上配合人民幣近日扭轉跌勢，再配合埋周三香港時間美國民主黨下一輪初選，拜登較大機會保持領先優勢，都可能對市況提供利好元素，淡友亦可能有所防備，喺沽空比率升至高位之下，再低開就可能成為本周挾淡倉契機。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
