資料圖片
中原城市領先指數CCL按周跌1.78%報174.94點，係4年來最大跌幅，樓價重返一年前水平。市況回落
，當然又有聲音認為政府要為樓市減辣。
如果分析走勢，喺呢跌浪時減辣甚至撤銷所有辣招，樓價肯定跌得更加快。當年推出辣招，政治口號上聲稱「需求管理」，防止樓價升溫。客觀效果係「供應管理」，當你好難買樓，變相唔會賣樓，大量業主買入起碼坐貨三年，形同貨源歸邊，配合聯儲局超低利率及量化寬鬆，成功造成樓價上升。一旦喺呢個時候減辣，賣咗再買返嘅機本成本冇咁大，加上升咗咁多年，點掟貨都係賺，供應增加價格下降，就係咁簡單。
假設現有辣招不變，呢個可能性亦最大，樓價走勢又會點呢？對本地樓價走勢最有參考嘅兩個指標，分別係失業率同埋股市走勢。
超低失業率已漸漸回升，最新1月份已升到3.4%。經過過去8個月社會運動，加上近月武漢肺炎，可以預期，失業率會持續上升。
香港樓市拉長十年，走勢同美股較似，但係每次港股出現跌浪，港樓最終都會跟跌。2月美港股齊齊下跌，如此推論，港樓係跌硬。美股自今年高位下跌16.53%，港樓則由高位下跌10.92%，相對而言，本地樓價只係下跌2.18%，幅度計肯定未跌夠。保守估計起碼跌美股跌幅嘅一半，即跌8.265%，以今年樓價指數高位178.84點計，今年樓價將見164.06點。
大家可能會話，減息喎，樓價必升！如果個個買樓都係一炮過唔使供，當然必升啦。但如果大家買樓都要用按揭，就要靠份工去抵押，有機會失業嘅時候，買樓就唔會咁勇，若果真係失業，就上唔到會。減息令樓價上升嘅效應，要喺經濟轉型後先可以應驗。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.entertainment.appledaily.com
