利字當頭 - 利世民 2020年4月23日
【利字當頭】創科綜援戶是怎樣煉成 - 利世民
前機電工程署署長薛永恒（圖）接替楊偉雄，擔任創新及科技局局長。互聯網圖片
香港有個都市傳說，企業不論大小，只要有任何涉及電器嘅問題，都係由IT一手包辦。
「搵個睇電掣嘅去睇創科局？都幾黑色幽默喎。」機電工程署署長出任創科局局長，好多人都會咁諗，我都係。
不過，有理由相信，政府又未至於膚淺到求其搵個「識搞電器」嘅人去睇創科。有讀者提我：「機電工程署係香港少數以營運基金運作嘅部門。」係喎，職能上創科局又真係睇埋政府嘅資訊科技總監辦公室同效率促進組等，某程度上又真係性質相似，有唔少可類比之處。
話說回頭，當年成立創科局，都好多朋友反對，覺得無啦啦做乜要架床疊屋：「香港咪有數碼港、科學園囉。」當時政府嘅回應係：「要有政策局去協調統籌政策同法規。」好呀，支持！不過好可惜，政府除咗派錢，就乜都做唔到。
講到尾，創科多少都有Disruption；Disruption，就一定會涉及到既得利益，而香港最大嘅問題，咪就係既得利益者太多囉。所謂複雜嘅政策同法規，更正確啲咁講，係大家唔肯面對政治權利同經濟利益嘅勾結。假如以為創科係派錢，製造更多既得利益者，咁香港係唔很會有前途㗎。香港所謂嘅創科，我都有唔少朋友，一毫子都唔駛政府幫，一樣做到世界通行。
我又見過另一班用創科包裝嘅尋租者既得利益，不學無術，淨係搵埋各種政府基金同科技券嘅著數。呢班IT界嘅敗類，同呃阿公阿婆配幾千蚊一副老花靚嘅眼鏡舖，又有乜分別？咁樣對社會有乜幫忙？納稅人嘅錢，咁樣又用得其所咩？之前，市場上根本唔缺資本，假如咁都要動用公帑，做創科綜援戶，呢啲靠政府嘅人，根本唔配做生意。
利世民
http://fb.com/leesimon.hk
本欄逢周二、四刊出
利字當頭 - 利世民 舊文
來源 source: http://s.nextmedia.com
