【笑到最後】一個逆市值博的注碼 - 高明
如果《蘋果》逆市訂閱人數提升，喺9月立法會選舉前政府會有龐大壓力，肯定要加碼派錢拉票。 資料圖片
全球派糧補貼，經濟活動大不如前已是人所共知；平行時空嘅資產市場，股市已再冇底下跌，樓市影響輕微，背後最主要原因係，零息政策。
當然，零利率只係一個
口號，你每個月按揭已經冇可能係零利率，稅貸更加唔使講。大肆宣揚零利率政策，只係想話你知，你今日唔買一啲資產，聽日啲銀紙就會貶值。
但係最終支持資產價格嘅，就係最基本嘅需求，有錢賺、有派息、有租收，呢個能力，同爆發武漢肺炎前嘅世界已經差好遠。暫時睇，未來18個月仍然會維持現有局面，呢個困局係，任何收入變得珍貴，一啲仍然可以生息嘅資產，投資者唔介意收益率低啲都照買。但係另一方面，一部份嘅資產一冇息收就會見血，寧願負值掟，近例就係期油，因為炒家根本冇能力去實貨結算。較貼身嘅資產就係的士，一遇逆境冇租金收入，泊車維修全部係錢，經營賬亦出現負值。最悲觀嘅假設係，任何資產冇政府強迫力屈人要錢，收入來源都唔穩陣，有可能斷崖變負值。
咁喺呢個環境下可以點做？一、盡量保住收入來源；二、屈政府機，特別係有全球最多儲備嘅香港政府。近期網上討論一話題：「冇咗《蘋果》會點」。抽離少少睇，應該講冇咗新聞自由會點。武漢肺炎嘅源頭武漢市，最近一單新聞話，武漢政府派5億消費券救市。當全球界政府派錢、代出糧時，欠缺新聞自由嘅地方，喺一個千萬人口嘅地方派5億現金折扣券。如果香港冇新聞自由就唔需要有任何措施出現，因為你一定要含笑接受政府任何決定。
訂唔訂閱，純粹自願，但以每月58蚊代價，嚟博政府加碼推出其他派錢措施，如果逆市訂閱人數提升，喺9月立法會選舉前政府會有龐大壓力，肯定要加碼派錢拉票。高明認為值博率高。利益申報：一開始就訂蘋壹，冇cut。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://s.nextmedia.com
