【異動空間】下月再現負油價？ - 魏力
產油國無法達成部份停產協議，貼錢賣油將會重演。 資料圖片
期油負價慘劇越來越花生，有市場人士發現，芝商所（CME）在4月15日靜雞雞出通告，話自己已更新系統，就算油價出現「零或負數」，CME系統亦能正常運作，仲要即時生效。
究竟CME真係咁醒水，
抑或「有心人」一早提水？不說自明。更重要是，當時距離5月期油結算只有不足1星期，券商想更改系統亦難以趕及，何況發夢都無諗過油價可以變負，結果被殺個措手不及。
至於這位「有心人」是誰？最大嫌疑就是打價格戰以本傷人的沙地。油價跌唔緊要，就沽空期油賺一大筆，不少資金在油價近零時撈底，以為最多本金歸零，結果中了個大伏，埋單-37美元結算，無仇報。
6月期油會否又變負？先戴頭盔，魏力絕非油市專家，只是嘗試運用現有資訊作邏輯分析。上月空軍偷襲得手，今次大家有所防範，撈貨者必然大減，變相令沽空難度增加。但從供求分析，疫情減而不退，美國上周五確診人數創新高逾3.8萬人，倉卒復工只會拖慢復蘇，令石油需求持續低迷。
另一方面，市場預期1個月內，全球34億桶油儲空間將會爆滿，目前至少有1.6億桶在海中漂浮。如下月中交割期前，產油國無法達成部份停產協議，貼錢賣油將會重演。作為駕駛人士，魏力最希望當然係減油價啦！
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://s.nextmedia.com
