【中環在線】滙豐贊助建精神健康體驗館 - 李華華
滙豐總經理廖宜建（左二）出席精神健康體驗館的主持典禮。
香港人精神壓力大，過去一年仲要經歷社運衝擊，捱埋武肺突襲，嚟緊又有港版國安法登場，真係想精神唔爆煲都難。而近期俾中英夾擊表態嘅滙豐，其有份設立的香港首間精神健康體驗館（Mind
Space），日前剛好落成，由集團總經理兼亞太區環球銀行主管廖宜建（David）主持典禮。
華華乍看，以為David升職後壓力大要造訪，原來只係模擬體驗病患情況，佢都好有心，呼籲大家正視精神健康，消除誤解歧視同關心身邊人。
體驗館由青山醫院構思籌建，下半年開放予公眾免費參觀，預計每年可接待1.6萬人。除模擬體驗幻覺幻聽等徵狀外，館內仲會介紹青山醫院歷史，亦有精神病康復者擔任義工，與參觀者交流分享。
滙豐之所以贊助Mind Space，要追溯到2015年慶祝150周年，當時集團透過慈善撥款3.77億元，資助11個由慈善團體構思的項目，體驗館係其中一個。
李華華
mailto:LiWaWa@AppleDaily.com
中環在線 - 李華華 舊文
來源 source: http://s.nextmedia.com
