【智取大市】股神敗在不賭博 - 晉佳
股神畢菲特俾人鬧蠢材，係唔係預示美股太超買？ 資料圖片
美股由龍頭科技股炒到龍尾航空股，再翻手炒埋妖股，連續兩日有中概妖股單日炒高幾百巴仙，新股日日狂升兩成。至於港股，龍頭物管股跌，資金喪炒10億市值樓下甚至平時冇乜成交嘅次線物管股，一樣響曬警號。
當股神俾人鬧蠢材嘅時候，美股會唔會太超買？呢個時候，沽美股離場驚變成第二個「畢菲特」嘅話，為咗將盈利袋得穩，惟有用注碼控制風險，總之保持淨現金水平。去到蛋散狠狠恥笑股神嘅時候，仲同你孖展？
環球救市令資金氾濫，可以喺疫情未過之際炒到癲，股價似無上限之際，疫情亦令風險難有上限，極多遊資加上極高風險，後市注定大幅波動。美國加州同德州疫情升溫，似乎向住悲觀情況發展，股市超買總有一刻要停，問題係蛋散恥笑股神係咪去到臨界點。疫情未改善之下，受累股如AAL、BA之流，股價反彈得急，其後有機會快速回落至之前大反彈起步位，論基本因素本屬絕不應吸納，而以AAL計，short interest可以去到已發行股本超過三成！之前大反彈嗰兩日，單日成交量已經達到整個已發行股本！對於一隻幾十億美元市值嘅股票，確實非常罕見。由此可見，疫情令AAL由航空股變成一個賭場，股價已由淡倉同供求主宰，股神太早沽，其實係非戰之罪。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com
