【操盤手劄記】大陸的死穴在哪？ - 割柑人
大陸政府最大嘅死穴係怕政權不穩，故會力遏不穩因素，例如失業、樓市惡化。 資料圖片
一波未平，一波又起！隨著各國重啟經濟，南韓、日本、中國、美國疫情反彈。中國首都北京4日新增79宗本土感染；美國50州中21州新增確診人數回升。事實上，全球新
增確診人數上周連續3日創新高。經濟復蘇堪虞，美股如坐過山車。
美股道指、標指出現島形頂轉勢訊號，納指跌穿上升軌，反映美股轉淡。周一，港股跟隨美股期貨跣低，收23776，跌2.2%，亦出現島形頂。大疫當前，經濟當殃，美國政府照例托底，將再注入一萬億美元紓困。香港喺呢方面，則有policymaker discount。
過去一年，越嚟越多戰友染指美股，一來分散風險，二來回報唔差。同戰友小勇講開，佢嘅心得係：建立資產組合，要睇一個國家同人民將財富放喺邊度（例如樓、股、滙、債），就係最值得投資嘅資產；該類資產出事，政府一定出手。
兩大經濟體——美國、中國，藏富喺邊？美國人愛買股票，美國所收嘅養老金都係買股票。2008年金融海嘯，美國政府出手救市，皆因樓市爆煲波及金融業同股市。中國人同香港人就愛買樓，香港政府都係靠樓市先有咁多收入，樓市波動必會維穩。
大陸政府最大嘅死穴係怕政權不穩，故會力遏不穩因素，港版國安法就係由此而嚟。大陸內部嘅不穩因素，唔係政治性，而係社會性——失業、樓市惡化。當人民無收入或財富大縮水，就會危害政權，所以政府唔想樓價急升或急跌，只想平穩。
現時美股、港樓價格仍然高企，入市要更審慎，嚴選買乜嘢、幾時買。港樓無謂高追，股票門檻始終較低，若無意美股，仍可揀港股。不妨留意創新科技股，如5G、AI、雲服務，以至內需消費股，分注吸納。
割柑人
本欄逢周二刊出
操盤手札記 - 割柑人 舊文
來源 source: http://s.nextmedia.com
