操盤手劄記│盈喜盈警辨真假（割柑人）
操盤手劄記│盈喜盈警辨真假（割柑人）
業績期尋寶，離不開兩類股份——績優股、盈喜股。
忽然放鷹！上周五，美國聯儲局主席鮑威爾喺國際結算銀行網上會議示警，如果明年中通脹風險嚴重，屆時將會加息。消息令美滙指數跌幅收窄至0.2%，收93.61；美股
個別發展，由於科技股對息口較為敏感，主要反映科技股嘅納指一度急跌，收市仍跌0.8%，道指則照破頂，收35677，升0.2%。港股ADR比例指數低水0.5%，ATM在美股價更較在港股價低1%至1.5%。
下載Yahoo財經APP
美股、外匯、加密貨幣免費即時報價，自選投資組合獲取相關新聞提示。
通脹、加息不斷纏擾市場，美銀10月全球基金經理調查顯示，由於通脹推高加息預期，導致債券配置下降，倉位淨減80%，減至歷來最低，淪為最不受歡迎資產；能源股、銀行股、商品等通脹受惠資產，則最受歡迎。當中，能源股居榜首。債券配置下降，又導致現金配置上升，淨超配27%，係上年7月以嚟最高。值得注意嘅係，當基金經理某類倉位異常擠擁時，往往會反高潮！
中移動績優 走勢呈突破
港股本周進入業績高峯期，多隻藍籌公布季績，包括周一嘅滙豐（005）；周三嘅港交所（388）、平保（2318）；周四嘅中石油（857）、中石化（386）、國壽（2628）；周五嘅工、中、建等國有銀行。當中，市場憧憬滙豐派成績表時，亦會宣布重啟回購計劃。恒指連日旗形整固，而10天線剛升穿50天線，若藍籌業績有驚喜，短線有望突破前浪頂9月8日高位26560；若有驚嚇，則將下試24700水平。
業績期尋寶，離不開兩類股份——績優股、盈喜股。先講績優股，上周三收市後派成績表嘅中移動（941）就係一例。中移動首三季純利按年增6.9%，EBITDA按年增9.5%，業績交到貨，大行亦收貨。彭博綜合券商預測，2021年至2023年盈利年複合增長率約6.6%。該股近日營造三角走勢，績後向上突破，現價48.95元，預測市盈率7.2倍，預測股息率7.3厘，加上年底有望「回A」，不妨留意。
大家樂盈警 實際虧轉盈
至於盈喜股，就要睇真啲。《上市規則》第13.24B(1)條、第13.24B(2)(a)條，分別提到出現某些事件或非經常性業務，就要發布盈利預告，但究竟何謂影響盈利預測嘅「重大改變」、何等幅度先算「盈利大幅增加或減少」，則無量化準則。喺咁嘅情況下，有時公司所發盈喜或盈警，會同實際業績出現落差，亦即所謂「假盈喜、真盈警」或「假盈警、真盈喜」。要識分辨真假，就要：留意盈利變動原因、比對往年業績、留意同業有否相關盈利預告。
上周五收市後發盈警嘅大家樂（341），就係「假盈警、真盈喜」一例。大家樂預警，截至今年9月底止半年，純利約8,000萬元，相對上年同期約1.6億元，按年減半。不過，上年同期利潤包含政府因應疫情發放嘅「保就業」資助近3.4億元，今年則無相關資助；若撇除該補貼，上年同期實際虧損1.8億元，意味今個半年度實際扭虧為盈。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
