操盤手劄記│大戶豪賭利率期貨（割柑人）
操盤手劄記│大戶豪賭利率期貨（割柑人）
有大戶豪賭儲局加息結果，合約總值1500億美元，圖為儲局主席鮑威爾。
大賭注！繼上周三美國公布6月CPI按年升9.1%，再創40年新高後，上周五美國公布6月零售銷售按月止跌回升1%，呢兩個數據令聯儲局本
月更重手加息嘅可能性上升。零售銷售數據喺紐約時間上午8時30分公布後，旋即有大戶喺8時47分喺利率期貨市場大手開倉，合約價值高達1,500億美元，方向係與日益升溫嘅本月加息1厘嘅預測對賭，如果本月只係加息0.75厘就贏。
美股、外匯、加密貨幣免費即時報價，自選投資組合獲取相關新聞提示。
呢筆交易係3萬份10月到期嘅利率期貨合約，佔上周五該期貨未平倉合約12.8%。呢批合約相當於每基點價值125萬美元，以1份合約價值500萬美元計算，總值1,500億美元。呢批合約10月31日到期，涵蓋聯儲局7月同9月嘅議息會議。利率互換定價為7月加息0.8厘，到9月時累計加息1.5厘——相當於兩次加息0.75厘。現時FedWatch數據顯示，7月加息0.75厘機會為70.9%，加息1厘機會為29.1%。
港股就算反彈 恐怕彈完散
上周五，美國除咗公布6月零售銷售回升，7月密歇根大學消費者信心指數亦回升，令經濟衰退憂慮稍紓；另外，聯儲局理事Christopher Waller、聖路易斯聯儲行長James Bullard、亞特蘭大聯儲行長Raphael Bostic都唔贊成本月加息1厘，亦令激進加息憂慮稍紓。市場氣氛好轉，加上花旗季績好過預期，帶動美股反彈，道指、標指、納指分別升2.1%、1.9%、1.8%。阿里巴巴美股（BABA）亦由低水5%，跌幅收窄至低水1.6%，險守紅底關口（折算100.52港元）。
港股方面，上周五收20297，跌2.2%，夜期高水32點，ADR比例指數高水9點，算係靠穩，但未脫困。走勢上，恒指五連跌兼六連陰，失守6月中橫行區底部20700，扭轉5月以嚟一浪高於一浪形態，10天線更跌穿20天線同100天線，淡友力量明顯較強。本周初就算反彈，恐怕彈完就散，預料先下試19800。除咗外圍有風險，內地亦有，河南村鎮銀行存戶追錢風波未平，20省爛尾樓業主停貸風波又起，內銀內房攬炒，不利大市。
公安系統被駭 阿里被約談
講返阿里巴巴（9988），本欄上周提到一周13間券商唱好阿里，點知話口未完就爆出負面消息，包括未依法申報交易被市監局罰款、戰略投資部門裁員超過三分一；最大鑊係阿里雲業務高管被上海市當局約談，涉及公安局資料庫被竊案，面臨10億中國公民資料外洩「問責調查」。根據網絡安全專家對元數據分析，該資料庫係託管喺阿里雲上，阿里員工亦已證實事件有業務關係。真係黑天鵝！
前周，有駭客聲稱駭入上海公安局資料庫，竊走10億中國公民個人資料，包括姓名、電話、地址、公民身份號碼等，並開價10個比特幣（約20萬美元）兜售超過23TB嘅資料。據報，管理該資料庫嘅「控制板」被設置喺公開網址上，而且無加密碼，上年4月起一直係咁，資料容易被竊。如果調查結果責任關阿里事，咁阿里前景就堪憂，話曬市場對其雲業務素有寄望，要挽回市場信心唔易。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
