投資的天空：忽發奇想有威力 - 張士佳
過去兩日中港股市表現似乎都麻麻，但又稱唔上差，只是在窄幅波動而已。當然，兩地股市未能趁?豐中國PMI初值勝預期而進一步突破，的確略為令人失望。個股動力減弱是事實，連續兩日股票升跌比例都接近三比七，但大市跌幅卻只屬輕微，之前人人話托沽，筆者睇來睇去都唔覺，當時明明大市唔鬱股票升，到這兩天開始無人提，托沽味道反而更濃烈。
內房抽水升唔起
個股動力轉弱在內房股身上體現，近期內房企業紛紛抽水，唔係發債就配股。
其實這個抽水潮在上月尾已漸漸開動，不過當時對內房股的升勢無太大影響，部份公司配股後更即日轉跌為升，未幾更破頂而上，但近日這個現象已不復再，例如融創(1918)及禹州地產(1628)都先後跌穿配股價，氣氛與之前明顯有分別。
另外，就連之前升得不錯的半新股也急煞車，昨日普遍跑輸大市。
在細價股炒風有所收斂下，部份焦點移到本地地產股。表現較標青之一是剛與萬科合作投得荃灣西地皮的新世界(017)，其作價高於市場預期，再創荃灣西站一帶地皮呎價新高。市場自然會解讀為地產商不怕政府出招打擊樓市，尤其新世界屬於「梁粉」陣營，而另一方的萬科是中資地產商，這更會令大家覺得特首梁振英應該唔會重手調控。政府施政方向筆者不懂估計，不過靚地難求，本港地少人多，供不應求亦是不爭的事實，所以高價搶地實屬正常。
我們更重視的，是新世界是否泊實「梁營」就代表有運行？好似好陰謀論，不過好多投資意念都是從一些奇怪想法衍生出來，唔好睇少忽發奇想的威力。
筆者未持有上述股票
張士佳
元大寶來證券(香港)業務及商品發展總監
與曾卓鋒(元大寶來證券(香港)客戶經理)聯合執筆
逢周三、五刊出
上一則: 青心直說：人行改革信心足 - 胡孟青
下一則: 炒友Blog：炭價回升恒鼎吼位買 - 邱古奇
投資的天空 - 張士佳 舊文
