金融High Tea——內銀風險有多大？
2013年3月26日
塞浦路斯計劃向該國最大銀行擁有10萬歐羅以上的存戶徵收20%的稅率，市場似乎已消化了塞浦路斯危機的負面消息。中港兩地股市開市表現強勁，恒指高開213點，內地A股其後打回原形，港股在中資金融股支撐下，表現硬淨。恒指收市升135點，報22251點，國企指數報10978點，漲82點，跑贏恒指，全日成交607億元。
最近睇美國電視節目《六十分鐘時事雜誌》，講到中國房地產有好大泡沫，有地方起咗樓無人住變鬼城。我唔敢話中國地產無泡沫，在內蒙古額爾多斯真係有鬼城，但係中國地產係唔係明天咁快咁易大爆煲，恐怕又無鬼佬講得咁易。同一個理由，鬼佬去年講到中國內銀股快爆煲，壞帳大幅上升，息差急促收窄，搞到內銀跌到七個一皮，的而且確，內銀亦係由高增長時代步入增長放緩的時代，息差慢慢收窄，又係唔係好似鬼佬講到咁恐怖，只值5、6倍市盈率呢？
內銀大行建設銀行(939)打頭陣上周五公佈上年業績，純利1931.8億人民幣(下同)，按年增加14.1%，預期中較好範圍，全年資產減值損400億元，增約12%。派息26.8分，派息比率保持在35％，令市場有驚喜。
建行純利雙位增長
證券界普遍睇好，美銀美林話建行去年純利按年升14%，符預期，建行的主要營運都和進度相符，第四季淨息差按季收窄2個基點至2.78%，主要由於貸款息率下調的滯後反應，貸款以及存款按年分別增長15.6%，以及13.6%，與同業相當。美銀美林指建行仍是它們在行內的首選股份，主要因其盈利能力高，撥備較審慎，以及資本水平強勁，維持「買入」評級，目標價7.12元。
里昂指建行去年純利上升14%，符合預期，但派息比率保持在派發35%，令市場有驚喜，相信其他銀行將會跟隨建行步伐去派息，但里昂提醒投資者應該小心今年第一季淨息差收縮的風險，指建行去年淨息差按年升5個基點，表明第四季淨息差按季保持平穩，待相信今年第一季將有8至10個基點的下跌，主要由於今年初開始按揭向下重新定價。里昂維持建行「跑贏大市」評級，因為建行派高息，導致其每股帳面淨值下跌。
低買高沽搵食不難
另外重慶農村商業銀行(3618)公佈，截至去年底止全年純利54億元人民幣(下同)，按年升26%，每股基本盈利58仙，末期息14分。
建行股價昨升2.3％，收6.31元。重農行升4.1％，收4.29元。公佈業績的季節，就是內銀收成的時期，建行開了個好頭，相信其他內銀業績唔會太差，內銀的大災難又沒有出現。建行現價市盈率6.5倍，以今年盈利估計市盈率是6.1倍，咁低市盈率，係預計佢將來盈利唔止無增長，仲會倒退，市盈率先至唔過10倍，但內銀盈利真是會大跌嗎？還是只是愈升愈慢，趨向平穩呢？
建行一年低位是去年7月造的4.71元，我在去年7至9月，而家市盈率都咁低，你講嗰時幾低？我喊破喉嚨講咗一輪叫大家買內銀，主要認為鬼佬睇得太差，內銀息差會收窄，但未至於崩潰，當時夠膽買，?家有兩三成利潤可以走啦。在一年之內，低買高沽內銀，都係唔錯的搵食方法，內銀有風險，但風險無鬼佬想像咁大。
陸羽仁
上一頁 下一頁
金融High Tea 舊文
