金融High Tea——牛奶味與朱古力味
2013年4月30日
■摩根大通董事總經理李晶講到，俄羅斯、巴西、中國等市場的股票欠佳，皆因資本傾向流住歐美。
內地五一勞動節，休市三天，5月2日才復市。港股昨天今天兩日自由行，加上昨日期指結算，更夾住無得跌，恒指昨先升後回，收市微升33點至22581點；國企股跑輸恒指，跌49點，收10786點。成交只有429億元。
今年以來，美股升了12%，日股仲誇張，飆升33%，內地A股卻跌了4%，再度成為全球主要股市中表現最差市場。表面看是市場擔憂中國通脹上升和經濟復甦疲弱，導致大量資金撤出市場，在3月資金淨流失達200億元，導致A股持續下挫。搞到內地官媒都出聲護盤，《人民日報》和新華網都開口，新華網好陰謀咁估外資一邊唱空，另一邊暗中買貨。
但摩根大通董事總經理李晶就講出另一個分析，國際投資者對新興市場持謹慎態度，全球基金經理把目光主要聚焦於美國和日本，俄羅斯、巴西、中國等市場的股票欠佳，皆因資本傾向流往歐美。外資在「唱淡沽空」A股的講法，李晶表示外資機構唱淡可以，但是缺乏造空機制，況且外國投資者在中國股市的投資僅佔1%至2%左右，中國股市還是由中國基金主導。外資直接大規模沽空A股的可操作性不強，只會瞄準與中國經濟密切相關的港股市場，沽空受中國經濟影響比較大的行業和個股。
我覺得李晶的講法有其道理。阿爺的確覺得中國股市跌得過份，但外資的看法一日未改，香港的H股難升，話時話內地自己都無動力炒起個市喎。
昨日個市唔係咁差，但煤股繼續受轟炸，以剛公佈季度業績的中煤能源(1898)跌得最慘，急滑6.2%，至5.91元，是昨日唯一一隻創出52周低位的藍籌股。佢公佈今年第一季度純利較上年同期下降38%，至16.55億元人民幣，差過市場預期。證券商都係睇淡多，德意志銀行認為中煤業績差主要因為現貨動力煤價格大跌，調整中煤能源今年每股盈利預測，現時市盈率11倍左右。德銀維持該股持有評級，目標價6.9元。
避煤股炒電股
昨日受中煤急跌拖累，其他煤股亦無隻掂，細隻啲的兗州煤業(1171)昨日再插4.4%，收8.07元，佢自呢個月中插穿咗去年低位9.92元之後，已經做咗潛水艇，日日都創緊新低。
煤股唔掂主要因為今年煤價繼續插，業內話現時煤價對煤企來說「利潤已薄如刀片」，再跌下去要入肉。由於煤價好似仲未到底，煤企股價同樣未到底。
舊時有隻朱古力奶電視廣告，影住一隻黑牛一隻白牛坐搖搖板，話「如果太多牛奶味，朱古力味無碇企，等到朱古力味返番嚟，牛奶味又唔爭氣」，一上一落，都幾似煤企和電企的處境，煤是發電的主要燃料，早幾年煤價大升電廠無運行，如今風水輪流轉，煤價下跌，最受惠是電企，舊年已出現這種情況，如今煤價繼續插，電廠繼續有運行喎。你睇隻華能(902)，昨日又升1.7%，收8.87元，昨日又創9.07元新高，過去一年佢股價沿一條完美上升軌咁升上來，基本上逢回吐買佢都無衰過。
瑞信就睇好華潤電力(836)，話佢旗下全資附屬公司華潤電力投資首季純利14.2億元人民幣，營運溢利按季升12%，反映燃料成本可能按季下跌，維持「跑贏大市」評級，目標價28元。潤電現價25.4元，可以等佢回到50天線，即23.2元時可時買入短炒，博再上15%。
陸羽仁
上一頁 下一頁
金融High Tea 舊文
