金融High Tea——骨水
2013年5月21日
港股昨日假期後表現威威，價量齊升，恒指創超過3個月新高，大漲410點，收23493點，漲幅1.8%，大市成交大幅跳升至691億元。高盛乘住好市，沽售手上持有最後一批工銀(1398)股票，套現11億美元。
高盛是以5.47至5.5元配售11億美元工行H股，工行昨收5.64元，升1.4%，略低於大市升幅的1.8%。以昨日收市價計，配售價折讓2.5%至3%，聞說在香港的認購情況不俗，單單在香港的認購數已超過高盛要配售的總量，未計高盛在倫敦和紐約收到認購數額，可以話配售十分成功。
新股認購有水多
中環茶友話，高盛沽貨把握的時機甚佳，因為有兩隻大型新股中石化煉化(2386)和銀河證券(6881)快將掛牌，佢哋各集資以100億計，一則咁大隻的股票上市，自然有好多人幫手炒高個市搞氣氛(各相關投行都出吓力)；二則佢哋兩隻招股完畢，放出一批已經游咗入香港的多餘資金，高盛就唔客氣，批工行食埋呢筆大水。
睇番高盛沽工行的紀錄，過去差不多1年1次，但今年繼1月沽貨後5月又沽，1年沽兩次，仲清埋貨㖭。連同昨日配售計，高盛5年內沽出工行股份6次，共套現約765億元，今年1月的配售價5.77元是歷次配售最高價一次，今次配售價比上次低約5%。高盛沽清後回籠金額，已遠超高盛2006年入股時所投入的25.8億美元(約201.2億港元)，佢藉工行上市獲取500多億元，而且自前年開始愈沽愈貴，雖然作價今次稍有回落。
有中環茶友問我認唔認得過，我話睇你短線定長線啦，短線的話，有「大戶沽貨愈沽愈高」之說，所以接佢貨都有機會走一程短途。但睇中長線就唔敢包啦，高盛清倉，你去接貨睇中長線，即係同佢對賭，你贏即佢輸，若果1年之後，工行升到8、9元，佢5個幾沽晒，即係你睇啱佢睇錯，你打贏高盛，唔係唔可能，只係機會細少少。
你睇工行今年高位6元，佢第一浸沽5.77元，距高位只是3.8%，佢咁大手沽有折讓，差不多摸頂沽貨，你1月接佢貨唔即走到依家仲坐緊艇，如今佢唔等工行上穿6元高位就急住沽骨水走人，係唔係意味佢認為個市都升到差唔多，食埋兩隻大新股上市呢浸就要散呢？呢個似乎係高盛的睇法，中唔中就無人知啦。
騰訊急抽莫高追
藍籌股以騰訊(700)表現最勁，騰訊業績靚仔，獲大行唱好，高盛升目標價由304元至320元；美銀美林上調其目標價8%至316元，評級均為「買入」，騰訊昨日除淨，股價抽高6.3%至309.4元，再創上市新高。騰訊股價已經連升第4日，累積升超過25%，昨日貢獻大市升幅60點。外圍炒緊「大數據概念」，有利科網股，本來有利騰訊，但佢近期升得太急，高追風險不少。
藥品股係表現比較差的行業。國藥(1099)係表現第2差的國企股，收22.5元，逆市跌3.6%；利君國際(2005)跳水4%，同仁堂國藥(8138)更大插近7%。相關行業在內地更跌得仲慘，係表現最差的行業，跌停板的股票比比皆是。主要原因係廣東省發衞生廳，上周末發佈了關於對基本藥物及非基本藥物的交易的規定措施，擬通過網上競價、量價掛鈎等措施，產品提價將受到監控，藥業股就無運行啦。
陸羽仁
上一頁 下一頁
金融High Tea 舊文
