金融High Tea——炒殘股
2013年8月23日
經過亞洲股市周初震盪，拖低恒生指數，香港股民驚恐情緒稍為穩定下來。由於港元保持堅挺，有人話反映資金未曾由香港大量流走，甚至認為香港會成為區內資金避風港。
五連跌 彈一彈
相對於印尼呢啲跌到七個一皮的股市，東南亞貨幣繼續下跌，香港看來比較穩定，但是否代表風浪已經過去，仲係言之尚早。中環茶友認為，現時市底仲係比較弱，買股動輒得咎，有子彈係手的投資者，仲係要審慎。
雖然大環境唔見得有改善，但連跌多日個市點都要搵藉口反彈吓，聯儲局收水言論無帶來太多新意，加上人行增加逆回購，令中資股帶動回升。大市昨日低開高走，同內地A股走相反路線，最後終結五連跌格局。恒指低開287點，待內地收市後再抽上，收市倒升77點至21895點，國企指數仲勁，漲110點，成交573億元，短期或者再彈吓唔奇。
大市動力主要來自中資金融股，恒生中國H股金融行業指數漲1.2%。內銀股全線反彈，其中表現最好係建行(939)，漲2.5%至5.84元。中行(3988)、農行(1288)及中信行(998)齊漲1.8%。
煤炭股昨日出現異動，全線反彈。其中兗州煤(1171)升4%，報6.83元，恒鼎實業(1393)升7%、中煤能源(1898)升5%，永暉焦煤(1733)漲6%。
煤炭股近期壞消息頻頻，昨日卻炒味濃濃，真係叫人𢱑晒頭，只能解釋係股價跌到咁殘，大家要博反彈又驚接火棒，於是炒吓殘股，既然個市係借匯豐8月份採購經理指數好過預期，咪揀同工業生產的煤炭股走番轉囉。
煤炭股績差價升
數字上睇，中國煤炭工業協會近日通報，話隨着內地經濟活力放慢，需求銳減。今年首七月全國煤炭產、運、銷均出現下降。產量較去年降3.5%，銷量降3.9%，發送量亦降1.2%。期內炭進口量增長，但出口量下降，庫存繼續處於高位，供應多，需求減，內地煤炭價格自2011年11月份以來，持續下滑。至8月初中國煤炭價格指數比年初下降11.6點，比2011年的高點更降了43.9點。煤炭行業利潤繼續大幅下降，大型煤炭企業賺錢較去年同期大降超過四成。
令煤炭需求雪上加霜係隨着內地對空氣質素的要求日漸提高，好多大城市大力推行「無煤化」。《人民日報》昨日就報道，今年北京預計將有4.4萬戶平房居民實現電採暖，將減少燒煤4.4萬噸。
大環境不利下，龍頭股中國神華(1088)今日公佈中期業績，股價升2.3%至24.15元。中煤能源昨日派成績表，上半年業績其實都幾嚇人，半年純利32億元人仔，按年跌38%，唔派中期息。
瑞信預期下半年煤價會更低過預期，下調中煤能源其今明兩年盈測17%及18%，目標價由5.9元下調至5.3元，維持「中性」評級。大摩的目標更低，只有5元，評級「增持」，睇嚟煤炭股唯一炒作吸引力，就係跌得夠多啫。
陸羽仁
上一頁 下一頁
金融High Tea 舊文
