消化
2013/9/18 9:22:33
網誌分類: 經濟
美國聯儲局昨日開始召開為期兩日的議息會議，美國時間今日中午(香港午夜)聯儲局主席伯南克開完記招，聯儲局公開市場委員會(FMOC)就會宣布議息結果。
投資者等待聯儲局貨幣政策會議結果。由於美國經濟數據近期唔係非常靚仔，少部份人估計聯儲局可能要褪到今年年尾，譬如伯南克臨離任前才宣布正式減少量化寬鬆(QE)規模。不過多數人認為聯儲局唔會再拖，因為當局由5月開始透過聯儲局主席及各官員的連番講話去做聯儲局開始退市的「預期管理」工作，而這個工作又做得好成功，無理由講咗唔做。
睇美股在臨近聯儲局「開退市第一鎗」的表現，波動愈來愈細，股市恐懼指標VIX指數亦長期維持在歷史低水平，聯儲局昨日開會，美股更係連續第三日造好。杜指升35點至15530點，標普500指數漲7點至1705點。反映大多數的投資者已經接受了聯儲局退市，以至最終會結束QE這個事實。
假設半年前，如果有人預測聯儲局正式退市，美股不跌反升，唔俾人當傻仔至奇。甚至連最支持QE的股神巴菲特於6月時亦曾表示，聯儲局宣布正式退市，將會「一鎗天下響」，會造成股市一陣短暫波動，不過，佢預期波動唔會好大。市場可以承受得起。
事實上，投資者已經沒有了因為憂慮聯儲局提早退市，將美國經濟狀況的好消息當壞消息炒。美國勞工部昨日宣佈，8月消費者價格指數(CPI) 及核心CPI 較上月增長 0.1%，符合市場預期，另外，9月份的房地産建築商信心指數升至58，創近8年新高。理想的經濟數據沒有推冧市，反而推動股市向上。
依目前市面上風平浪靜的情況睇，恐怕股神都會大跌眼鏡。惟一叫投資者憂慮的係聯儲局意外地太過進取，將削減買債規模擴大至市場預期以外，例如達到150億美元甚至200億美元，對市場將會做成負面影響。不過，估計出現這種情況的機會唔大，因為對投資者心理而言，踏出退市第一步才最重要，第一步細細地穩啲，想增大削減規模，可以根據日後市況慢慢做。
相反地，如果聯儲局將退市規模減少至100億美元以下，甚至出將正式退市的時間推遲到下次的議息會議，即10月29至30日，股市可能會大幅上揚。Virtus Investment Partners 的分析師昨日接受CNBC訪問時表示，「聯儲局正式退市，對市場有正面影響，投資者考慮資金分配時會集中於美國的金融業、製造業，離開原材料，以及新興市場。」
美股雖高，但好多股票睇盈利睇派息又唔錯，高有高的理由，好似微軟，做一個壟斷生意，無喜亦無驚，昨日宣布增加派息22%，由每股派0.23美元升到0.28美元，等如息率有3.3厘，好過放銀行好多。微軟加入咗一個大市值科技巨股高息股的行列，其他派3厘以上的有英特爾派3.8厘，Seagate Technology派3.7厘。而這種派息亦等同大消費股如Clorox、Pfizer的派息，是標普500指數成份股平均派息的雙倍。
以微軟計，12.7倍市盈率，唔算高，派3.3厘息，即使回吐都唔應該跌太多。所以美股交易員分析，美國大公司賺到錢，美股即使創新高，以盈利計都唔係咁離譜。
陸羽仁
回應(4) 我想回應
陸羽仁 BLOG 舊文
