金融High Tea——節前憂鬱症
2013年9月18日
■昨日本地二線銀行股，大炒收購概念，大新銀行抽高18%。
香港股民昨日以為仲可以炒吓薩默斯無得做聯儲局的水尾，點知遇到內地股市大插2%，恒指最後跌71點，只跌0.3%，都算執番身彩。
內地滬深兩地股市昨日低開後一路震盪下探，彈都無彈，午後跌幅仲要進一步擴大，最後大跌2%收場，除了大藍籌普遍下跌外，上海自貿區概念、土地流轉股等近期大力炒作的熱門題材股，昨日都有較大幅度的下挫；其餘近來都有炒作的周期股如金融、煤炭、有色金屬、機械、航運、航空股等回吐壓力亦大，中海集運和東方航空A股跌幅均逾7%。
中環茶友話，你話內地股市有乜特別利淡消息又唔覺，但昨日跌得多的股份，都係近日有炒作的股份，主要係升得太急要回吐，而一個催化劑是內地今天上班後，明天(周四)開始放中秋假，投資者出現「節前憂鬱症」，好快要放假，若手上持有的股票升幅已巨，揸在手上要下周一才有得沽，中間還要經過美國聯儲局決定收唔收水的會議，雖然話美國做乜唔係太關中國事，都係減少持貨安全啲，就出現一個小浪沽貨潮，有人沽無人買。
航運股升急回吐急
結果H股就受內地拖累，航運股跌幅特大，中海發展(1138)跌5.2%，資源股亦紛紛下挫，中海油田(2883)跌3.6%，中煤能源(1898)2.7%。好多都係升得多惹的禍，以中海發展為例，上周一開始見4.8元近期高位，跟住幾日三頂不破，然後急回，即使計埋昨日急跌，其實都未跌穿之前升得好急的上升軌，結論係「升得急回吐好正常」。
大股之中，回吐比較大的是近期表現神勇的中資金融股，成拖累大市的主要力量。恒生中國H股金融行業指數跌0.6%。內險股表現相對較弱，全線向下，其中國壽(2628)跌1.8%，太保(2601)及新華保險(1336)齊跌超過2%。內銀股個別發展，最弱係農行(1288)及重農行(3618)，齊跌逾1%。
永亨升到癲咗
內銀唔得，但本地銀行，尤其係二線的，大炒收購概念，炒到飛起。永亨(302)周一收市後公佈正與獨立協力廠商接洽，可能會出售所持有的45%股權，講到比廖銀更快成事咁款。瑞銀話本港銀行業過往有數次併購交易，平均市帳率1.9倍，若交易達成，料永亨有50%上升空間，目標價81.5元，評級「買入」不變。不過永亨股價昨日一步到位，裂口高開49%至124.7元，其後升幅收窄，收市仍然大漲39%至116.8元，超過瑞銀目標價好多。
市場重提併購，瑞銀指有利於大新銀行(2356)及大新金融(440)。兩隻股票昨日亦唔客氣，大新銀行抽高18%至13.32元，大新金融亦勁升接近一成至40.6元。其他銀行亦造好，東亞(023)升近6%至33.55元，創了52周新高。見佢哋升成咁，都唔識評價，話升得太癲可能佢哋會再升，但高追風險亦唔細，因為講的是收購，始終唔係百分百。
大笨象匯控(005)、恒生(011)及渣打(2888)則跟隨大市回軟。恒生微跌0.2%至126.7元，匯控跌1%，收86.2元，渣打跌1.9%至184.2元。中銀香港(2388)卻無起跌。佢哋咁大間無得炒收購，聽聞本地大銀行按揭生意呆晒，有賓卡話再係咁落去到年底，隨時成個按揭部要裁一半人，所以本地大銀行股票真係好難炒啦。
陸羽仁
上一頁 下一頁
金融High Tea 舊文
