理性預期
2013/9/27 上午 09:33:49
網誌分類: 經濟
美股連跌5日後，終於見到反彈。杜指漲55點，收15328點；標普500指數升6點，收報1699點。杜指期貨最新報15294點，比收市高33點，估計反彈仍會繼續。
美國經濟數據好壞不一。最近一周首次申請失業救濟人數意外下滑5000人至30.5萬，遠好過市場預期的32.7萬，係2007年中以來最低。
勞工市場好轉，但二季度GDP(終值)年化增長2.5%，差過市場預期的2.7%。報告指聯邦和州政府的開支從下降修正為上漲，但企業重新充實庫存的力度比預期差，壓住GDP的增長。經濟學家現時預測第三季GDP增長平均只有1.9%，即預計經濟增速將放緩。
有分析解釋，歐債危機冇爆鑊，中國經濟有轉機，中東局勢趨穩定，但企業仍然唔睇好美國經濟，唔願意補充庫存，全球最大的零售商Walmart更削減未來兩季訂單，估計係美國政客惹的禍，擔心白宮與共和黨人就政府預算及債務上限的爭論不休，最終阻礙經濟復甦。目前白宮與反對黨共和黨控制的眾議院，在開支預算方面的主要分歧，主要係是否停止向2010年醫保法案撥款。
美國政府表示，唔通過預算案，好多政府部門下星期一就要停止運作。據管理與預算辦公室(Office of Management and Budget)估計，1995年與1996年美國政府關閉30天，共造成超過14億美元的損失，按照今天的貨幣價值計算約為20.9億美元。
以民主黨人為主的參議院上日提出了一項議案，旨在不終止向醫療保健法案撥款的情況下，政府可以繼續正常運作。但衆議院議長博納(John Boehner) 昨日表示，衆議院不會通過參議院呢個議案，但佢又同時話美國政府部門唔會關門。而財政部主管Jack Lew就話，下月17日是債務上限草案的真正死線。
而家市場的問題係預哂無問題，呢個係所謂理性預期，認為人是理性的，問題自自然然會解決，政府不會關門，這些人叫大家睇睇今年可能出現的「災難」:歐洲結果無爆，中國經濟轉好，敍利亞危機止息，薩默斯又做唔成聯儲局主席，無樣衰嘢成事，所以國會爭拗撥款的亂象必可解決。
但有美股分析員指出，最大的問題是市場完全無預危機會出現，從VIX指數長期處於低水平，認沽期權價平，股市在近高位，當正無事。可以有理性預期，若大市有一定危機感，唔係咁高，才有一定值博率，但大市毫無危機感，當正理性預期的事(問題解決)100%會發生，值博率就下降。萬一出現一些預期以外事件，即使未必真係爆煲，危機閃一閃，市場都有空間調整。
陸羽仁
回應(4) 我想回應
陸羽仁 BLOG 舊文
