金融High Tea——零售股變大喊十
2013年10月11日
內地房地產每年9、10月都係傳統旺季，有「金九銀十」的講法。今年「銀十」效應明顯，北京、上海、廣州的成交量均比去年同期有明顯上升，而且房屋成交價維持高位，內房股炒味濃，龍頭股中海外(688)連漲第三日，昨日升1.3%至24.1元，三日累升近6%；恒大(3333)派番去年末期息兼9月賣樓不俗，更連升六日，昨日再升多少少0.8%至3.67元，累積升幅超過14%，內房股總算出番半個頭。
內房股有「金十」，但零售股就唔係幾得啦，黃金周假期旅客零售銷情未如預期強勁，多隻本地零售股就變成「喊十」。
內地推出《旅遊法》，禁止零團費旅遊，導致國慶黃金周假期訪港旅行團數目大減，但旅行團少咗自由行補番數，期間整體訪港旅客人數仍較去年升，旅發局統計假期首6天，旅客增長17%，本來仲有少少期望，但結果亦係失望。
化妝珠寶股轉勢
化妝品股卓悅(653) 昨日公佈，黃金周(即10月1日至7日)期間，港澳地區之零售銷售按年增長只有6%，同店銷售則增長10%，生意追唔上旅客人數增長。
卓悅昨日捱沽，勁跌8.4%至1.63元；同類股莎莎(178)在國慶假期間的港澳同店銷售增長僅為6%，低過管理層及該行預期的低雙位數增幅。瑞信將莎莎目標價由10.5元降至9.7元，評級維持「跑贏大市」，莎莎插5.9%至8.2元。隻股自上月中和本月初造了9.31元和9.28元的小雙頂走勢，然後急回，睇嚟呢浪調整無咁快完。
珠寶金飾股亦全線唔掂，其中周生生(116)及周大福(1929)齊插，兩隻股份同跌約2.7%。近期內地客送禮少晒，第一生意唔好，乜都要慳，送禮都細手筆咗，第二內地真係打貪，官員收嘢亦無收得咁明目張膽，所以佢哋借啲意都送少咗，所以香港名錶珠寶做少好多生意，係意料中事，但化妝品都賣少咗，就證明普通自由客消費都少咗啦。
我認為好多零售股升過龍，大家好似認為莎莎、卓悅呢種消費唔受打貪和經濟放緩影響，一條氣咁炒上去，炒到莎莎有28倍市盈率，佢到3月底中期盈利升19.7%，下半年能否保持上半年升幅都係問題，呢種市盈率似乎太貴啦。
同樣道理，周大福至3月底中期盈利跌13%，咁又點值20.7倍市盈率呢？好似大家都期望佢哋下半年生意會大升，?家過埋黃金周都無大升，都估到黃金周之前生意亦唔慌勁，咁至9月的全年盈利都唔好有太大期望啦啩。
耶倫點玩要等等
最後講兩句個市，美國預算案及債務上限困局未解，不過總統提名鴿派人物耶倫做下任聯儲局主席，美股即時企番定，亦帶挈港股高開44點，但內地A股走軟，恒指開市無幾耐就玩插水，一度倒跌291點，失守23000點大關。及後跌幅逐步收窄，收市跌83點，收報22951點；個市尚算硬淨，未來要睇吓美國佬點玩啦。
陸羽仁
上一頁 下一頁
金融High Tea 舊文
