照方執藥
2013年11月06日
在十八屆三中全會召開前，港股反應神經質，市況跟隨內地波動。深滬股市早段跌得急，搞到香港都風聲鶴唳，其後內地股市回穩，港股先由低位回升。
A股腳仔軟，主要係傳十八屆三中全會後將重啟新股發行，滬深股市齊瀉，上證指數低開後曾挫1.09%，深成指更一度急跌1.75%，不過人行昨早再逆回購放水80億元人民幣，兩市接近中午回穩，午後更由跌轉升，以近全日高位收市。絕大部份行業板塊午後倒升，文化傳播股大漲逾3%，農業股、通訊設備股、公用股、石油化工股都有進帳，惟內地首批民營銀行有望明年初「出爐」，內銀股及券商股仍普遍受壓。
由於內地尾市回穩，港股險守23000關。恒生指數收報23038，跌150點；國企指數收報10637，跌48點。本港股民若然要短炒，最好都係照住內地藥方執番劑，睇住環保、農業呢幾瓣先。
睇住內地瓣數炒
匯控(005) 第三季業績按季倒退近20%，差過市場預期。好彩是季內成本節省4億美元，累積節流成績超標。業績雖然麻麻，但大行普遍睇好匯控前景。天達證券表示，對匯控收入按季跌至151億美元並不感到失望；環球銀行及資本市場收入按季只跌13%，已優於其他已發展國家的同業。摩通指匯控核心一級資本充足率按季有所改善，資產質素改善令撥備按季回落18%至16億美元，是正面因素，給予「增持」評級。睇得最好的是野村，超過105元，最差嘅係德銀，睇87元，與現價相若。
股仔近期日日都有爆上，昨日到隻香港資源(2882) ，原因係集團計劃向六福(590) 出售金至尊部份股權，兩股昨早齊齊復牌，香港資源應聲爆上，升幅成為港股之冠，收報0.27元，狂升47%；六福倒跌1.43%，收報27.6元。兩隻以經營黃金為主的公司，六福市值162億元，香港資源市值不到9億元，唔講基本因素，兩家公司談戀愛，邊個好炒一睇就知，所以復牌反應一升一跌好合理。
香港資源最主要資產係經營賣金的金至尊，陸羽仁曾經同創辦人林世榮有一面之緣，佢係一個好有諗頭，會用時下用語即係有創意的人，他用了馬克思理論裏面提到的金廁所來打造景點，旋即成為中外媒體的焦點，令公司知名度大增。
金至尊炒第二春
臨過世前，他和陸羽仁食飯，預言若奧巴馬上台，黃金會衝破一千美元盎司價，而家回頭睇覺得呢個分析無乜出奇，但當時金價仲係800美元一盎司，所以他的預測可以話相當大膽，可惜無幾耐佢就離奇死亡，公司仲迅即陷入財困，亦令人明白原來好多事情係無表面睇咁簡單。
當年金至尊對內地市場雄心壯志，林老闆一早定下大計，佢未見到自由行大旺，就出師未捷身先喪，公司就由黃英豪為首財團收購，仲搵咗恒基李四叔親家入股，由於有了新概念，股價狂炒一番，無奈係經營上缺乏突破，股價連年下跌，小股東紛紛坐艇。
今次金至尊搵到六福發展第二春，以六福對中港金飾市場的了解，大家估會有正面作用，但呢類合作最後到底會唔會成功，係要講兩間公司管理層的化學作用，不過股價就有理無理先炒一輪。對坐咗艇的小股東嚟講，既然而家仲係太平洋，隻船個摩打又郁郁地，咁亦不必心急趕落船。
陸羽仁
金融High Tea 舊文
