又見過山車
2013/12/31 上午 09:15:54
網誌分類: 經濟
美股昨日繼續平淡渡過。標普500指數收平，報1841點；杜指則微升26點至16504點。新年前夕，美國市場沒有重要經濟數據出爐，加上大部份的交易員都抱住年尾收爐，明年再戰的心情，估計大市今日變化唔會大，平穩過渡至2014年。
美股2013年可以講係大豐收。至昨日為止，標普500指數今年勁升超過29%！係1997年以來升幅最大的一年。細價股表現更厲害，羅素2000指數大漲近四成！
亞洲市場又點呢？最威就係日本啦！日經225指數今年累計飆升超過56%！係東京股市41年來最大漲幅。台灣同馬來西亞都唔錯，有12%及11%進賬，南韓微升1%。
恆指去年今日收22656點，昨日收23245點，有2.6%升幅，回報好過銀行存款。中國A股就弱雞啦！上證綜指全年跌7.6%，僅僅好過泰國，跌7.8%！
展望2014年，美股同日股雖然今年已經升咗咁多，但市場普遍仍然睇好。百仕通集團(TheBlackstoneGroup) 的全球首席分析師Russ Koesterich昨日提議投資者明年加碼投資美股，雖然明年的股票會貴過今年，但回報仍比投資債券及持現金吸引。
至於日股，預計明年繼續走強，原因係在安倍經濟學對經濟的提振作用下，日本前三季度GDP有較快增長，通縮狀況明顯緩解，截至10月，CPI已連續上漲5個月。日本央行還會繼續猛印錢紙，繼續推高日股。另外，日元對美元持續貶值，昨日已經跌到105日圓兌1美元。以出口為主的汽車及電機等企業將繼續受惠。
港股受美股同A股拉扯，有點身不由己。但是好是醜最終都要睇A股。內地A股是好是壞，主要睇銀行股整體表現，因為金融板塊在MCSI中國指數佔了超過34%的比重。
中國A股係咁跌，平價股通街都係，按野村國際的數據，內地A股本來12個月的市盈率為9.3倍(美股大約16倍！)。內銀AH股過去兩週更係受到內地「錢荒」拖累，跌幅由5.5%至7.3%不等。不過，分析師普遍認為內地銀行股估值超低，好多內銀股的股價已經跌低過賬面值，大摩估計2014年的平均PB值只有0.8倍。而交銀國際董事總經理兼研究部首席中國策略師洪灝則指出金融危機時中國銀行的PB值只有0.5倍，即係話雖然內銀股目前價錢好平，但可以更平！關鍵係銀行體系的呆壞賬一日唔清，銀行的股價都唔會有運行！
有分析師指出，銀行大部份的信貸擴張並沒有提升增長，而係變成不斷增加的呆壞賬。變相吸收了市場大部份的流動性。更嚴重的是，有些分析師唔單止對中國銀行在中國經濟放慢而壞賬卻增加的大環境下的前境有所懷疑，更憂慮銀行壞賬最終引發的後果究竟會有幾大？
亞太匯瑞銀的財富管理部首席投資官Hartmut Issel認為, 市場基本上認為內地所發布的壞賬數字只會係最保守的數字。究竟實際有幾多，就無人會知道啦！
中國排第十二的中信銀行月初表示正尋求股東的同意，撇呆壞賬52億元人民幣。就即時引起市場對於內地銀行業貸款質素是否全部都在變壞的憂慮。
Issel認為只有當情況變得較容易理解，或者黑箱作業的風險減低，內銀股才能真正顯示其投資價值。因此中國政府急需推動中國金融改革，內銀股板塊才有重新評估的機會。但問題係，凡事都有代價，阿爺出重手整治金融業，股市以至整個經濟必定要經歷一個可能比現在更痛苦的階段。睇阿爺近期表現，似乎事在必行。大家明年要縛好安全帶啦！
陸羽仁
(我不在港，暫停答問，見諒。)
回應(2) 我想回應
陸羽仁 BLOG 舊文
