炒到七彩
2013年12月31日
美國科網股twitter被唱淡，無礙港股高開，反而喺阿爺放水唔係咁爽手，內地拆息繼續企喺高位，A股繼續腳仔軟軟，令港股無力上升，大市主要靠科網股騰訊(700) 帶動整個板塊，同埋物流股受電子商貿概念帶動，撐住大市氣氛。
科網帶動物流股
twitter喺美國上市，由被唱好貴到變成超貴，結果年結前被大行質疑佢值唔值咁多錢。佢開始被人話佢貴，其實已經等如問佢值唔值咁多錢，但一樣炒到超貴，可見呢類概念股係講信唔信，唔係講值唔值，若然覺得信，咁咪多多錢都值囉，掉轉頭講，就算股價平啲，都係唔值，就係咁簡單，所以炒呢啲股，一係你對她的信念有好深認識，心目中有自己一個價；否則就係要跟紅頂白，無得拗頸。
twitter雖然撻低，但對香港科網股無乜影響，有大行話隻騰訊值700元，呢個指標係同之前話睇500元再進一大步。騰訊係間有錢賺的公司，有商業模式同發展前景可以睇，無twitter咁虛無，佢炒上主要係市場又開始講緊今年上半年，阿里巴巴會嚟香港上市的故事。
阿里巴巴舊年爭取上市，主要係一班創辦人同另一主要股東雅虎上有回購協議，若然能在限期前上市，收購價錢相對有利，無奈係受股權結構拗數傾唔掂，阿里無法趕及限期前上市，而家情況改變咗，阿里嚟唔嚟香港上市，有小小國策影子。中央對於大型網企去美國上市，似乎唔係太過欣賞，咁樣阿里要上市，香港就係最好選擇，問題係點樣搵到個妥協方案，解決股權架構問題，呢樣嘢可能要港交所做吓嘢，阿里又做吓嘢。有分析認為阿里在港掛牌，加埋騰訊，中國最強的三大網企，就有兩隻係香港上市，大大有利香港作為科網公司集資基地的位置，可能因為見到有咁樣的眉目，科網概念就偷步炒吓。
炒世盃掀彩票熱
香港炒股不炒市，恒指升完轉跌，跌完又唔肯落，結果升番一點收市。恒生指數收報23244；國企指數收報10770，跌59點，成交略為回升至416.46億元。今日只有半日市，基金就算此時入市粉飾櫥窗，動作都唔會大，到明年1月，基金要調整組合，先至重新開局。
昨日除咗科網股外，近排彩票股都借住網炒概念起哄。內地自從第一家彩票類上市公司500彩票網(500.com)在美國上市成功，彩票概念股即時惹起市場關注。彩票行業近兩年異軍突起，去年銷售額突破2000億元人仔，有報告預計，今年將大升五成，突破3000億元大關。2014年巴西舉行世界盃，更係賭波超級旺季，台面台底投注額都會大到難以想像。放假前市場開始炒隻第一視頻(082) ，昨日就借住「有私募基金近期集中調研彩票業」的報道，大炒特炒。中彩網通(8071) 飆升44%至0.475元，高踞升幅榜冠軍，認真炒到七彩！華彩(1371) 唔執輸，升超過一成一，收0.5元。
講開博彩，昨日有兩隻新股首日掛牌。買中喺新加坡提供電力工程服務的工蓋(1421) 就贏啦。揀內地大理石生產商雅高礦業(3313) 就無運行啦。工蓋收0.6元，較招股價升20%，不計手續費，一手執500元。雅高礦業收2.52元，較招股價2.65元潛水近5%，一手蝕130元，捧場客有幸有不幸。
陸羽仁
金融High Tea 舊文
