內地收水仲得人驚
2013年12月20日
要死唔得活，最緊要爽快。數據接連強勁，美國退市幾成定局，結果聯儲局主席伯南克臨別細細哋「抽波」，決定每月減少買債規模100億美元，由現時每月850億美元，減少至750億美元。如經濟持續改善，會進一步減少買債。美股聞訊不跌反升，杜指大幅高收16167點，急升292點，香港反應就差好多，高開後好快回落，下晝仲愈跌愈急，境況一度幾嚇人，到歐洲股市開市又升，顯示對同一個消息，不同市場反應分別好大。
退市有咗答案，美股反應勝港股，屬於正路反應，美國有條件減少泵水，說明經濟改善，港美經濟唔同步，但就同樣受資金供應減少影響，自然無理由跟美股去癲。聯儲局泵水減少，有分析話資金將會退潮，方向係由新興市場回歸歐美，香港作為中途站，變成咗撳錢的櫃員機，效果立竿見影。
睇圖插到穿晒位
中環茶友笑言，周三諗過偷雞入市，見到個市炒上咗無郁到手，昨日又有機會吼吓有無平貨，證明現時買股要無懼無喜，入貨要等低撈，見高可以走吓位囉。
港股咁弱，關鍵唔在美國收水，而係內地收水，人行連續兩周暫停逆回購，二周上海銀行同業拆息(Shibor)攀升至6厘以上，一個月Shibor更超越7%，上證指數跌勢轉急，港股下午就跟隨急插。A股連跌八日，港股尾市曾插逾三百點，最終失守23000收市。恒生指數收報22888，跌255；國企指數收報10777，跌183點，成交金額743億元。睇技術走勢跌穿晒位，非常醜怪，諗唔到係大家望住聯儲局會議，點知美國收水唔可怕，內地收水仲得人驚，搞到跌穿咗好多人個頭。
上證綜指締造出八連跌，連番跌市主要係拆息係年尾扯高，本來呢個係埋年數常見現象，今年情況就比較惹人關注，大家擔心收水力度有幾大。全國經濟會議後，明年增長目標外，資金調控係另一個焦點。由於預期收銀根會維持偏緊，係水乾日子，股市反應就特別激烈。按正路嚟睇，如果息口再升，央行有可能會出手紓緩，到過埋年情況穩定下來，市場情況會有一陣改善，在一段時間，央行都會維持收吓放吓，慢慢縮水的政策。
百元濠賭股誕生
雖然指數唔靚仔，濠賭股繼續偷步炒聖誕檔高峰期，昨日終於有隻濠賭股破百，躋身紅底股，就係新濠博亞(6883) 。新濠博亞由年幾前二十幾元升到昨日收市報100.5元，市值膨脹到1600億，一啲都唔細，該公司經營兩個大型娛樂場所新濠天地及澳門新濠鋒，亦以非賭場模式經營摩卡娛樂場業務。集團正發展擬於澳門路氹城開發以電影為主題而集娛樂、零售及博彩於一體的綜合度假村新濠影匯項目。
新濠博亞有兩個聯席主席，除咗港人熟悉的何猷龍，佢兼做行政總裁外，另一位聯席主席係澳洲小賭王帕加，佢係富二代出身，老豆一早已經係澳洲首富，帕加接收咗老豆副身家後，轉而大力投資博彩業，除了咗在澳門落注，在澳洲都大力發圍，結果財富比老爸打骰時期再上一層樓。過去十年亞洲富起冒起最速的途徑有兩個，一個係投身科網業；另一個就係做博彩呢個古老行業。賭王名言，唔怕你精、唔怕你呆，最怕你唔來，內地開放出境，旅客大批湧來，你話博彩業點可以唔富貴逼人來！
陸羽仁
金融High Tea 舊文
