調整正常
2014/1/7 上午 09:33:20
網誌分類: 經濟
美國供應管理協會(ISM)12月服務業採購經理人指數53點，低過11月的53.9點，且遠不及市場預期的55點。市場比較關注的是12月的新訂單指數較上月大跌7個百分點，至49.4%，係2009年7月以來首次跌落萎縮區域。
受消息拖累，杜指昨日先升後跌，收市報16425點，跌45點；標普500指數跌5點至1827點。踏入2014年，美股已經連跌3日，杜指及標普500指數累積跌幅分別為0.9%及1.2%，但相對港和大陸股，呢種跌幅只是濕濕碎。
市場的憂心忡忡，但滙豐銀行的貨幣策略師林奇(Robert Lynch)睇法比較樂觀，認為新訂單資料或許引發市場對未來走勢產生一些擔憂，但總體的ISM指數維持在53點，顯示服務業還是在相當不錯的擴張走勢中。再睇去年11月的工廠訂單增長1.8%，較市場預期的1.7%為高，整體的增長更係主要由耐用品訂單大幅增長(期內增長3.4%)。
美股踏入2014年，表現呆呆滯滯，昨日朝早係今年首次回升，但最終仍然頂唔住，回歸跌勢。唔少投資者都生出美股究竟出了什麼毛病，點解新年流流，走勢咁肉酸？
綜合市場的分析，導致美股下跌的理由主要有五個。首先係大市開始反映聯儲局開始收水的效應；第二係市場資金的重新調配，基金一般都有一個投資股市及債券的固定比例。美股去年升得咁勁，投資於股市的金額大漲，基金便按比例沽出股票、買入債券；第三係中國經濟數據疲弱，打擊了新興市場經濟，拖累全球經濟；第四係美國剛出爐的經濟數據包括ISM指數，汽車銷售及零售數字都唔靚仔；最係係北美洲天氣今年特別寒冷，連場冰暴令航空公司損失了好多最賺錢的臨時訂位(last minute bookings)，利潤大受打擊。昨日，運輸板塊內的20隻航空股，只有Delta航空靠穩，其餘19隻全球向下。
但紐約市場人士則認為美股表現好正常，有毛病的反而係投資者，因為他們覺得大市唔能夠日日升就係出問題。美股去年底的最後兩個星期，差唔多一日高過一日，時至今日，唞唞氣、整固一下係好正常。大市惟一不太正常之處，係成交量到昨日為止，仍然非常清淡。大部份的交易員昨日已經返工，但紐交所的交投量仍然遠低過平日。
我覺得美股無事，高位調整一點係正常的事情，大陸股樣衰啲，上證綜指而家2045點，跌得特別多，或者要下試去年6月低位1950點。你睇隻2823跌得多過2828，就知道大陸個市拖住香港向下行。
陸羽仁
回應(7) 我想回應
陸羽仁 BLOG 舊文
