頭頭碰着黑
2014年01月07日
港股新年後認真唔靚仔，上周插咗五百幾點，美國預託證券雖然好番少少，但昨日開市又再插過。
內地利率偏高，但政府停止逆回購，加上製造業及出口數據唔理想，實體經濟仍在放慢；A股新股發行重啟，又抽走市場大筆資金，A股表現不濟，金融及地產股重挫，拖埋港股落水，總之衰起上嚟頭頭碰着黑。
弱勢板塊熊勢畢呈
港股真係差得交關，恒指上周五重挫522點，昨日彈都唔彈吓，朝早更一度失守250天牛熊分界線22605點，低見22567點，較上日收市再插250點。及後逐步反彈，收市跌幅收窄至133點，收報22684點。
喺缺水同退市陰影下，內房、內銀及內險股係跌市重災區，呢幾個弱勢板塊已經係熊勢畢呈。內地傳媒報道，個別內地銀行將收緊首套房貸，內房股全線大跌，龍頭股中國海外(688) 跌2.6%；潤地(1109) 跌1.5%；恒大(3333) 跌1.7%，跌幅已經比較溫和。其中世茂房地產(813) 及保利置業(119) 跌超過3%；合景泰富(1813) 跌近6%；龍湖地產(960) 亦跌近5%！
恒生中國H股金融行業指數昨日跌1.7%，內銀及內險股全軍覆沒。交行(3328) 、農行(1288) 及重慶銀行(1963) 最弱，齊跌超過2%，內險股則數太保(2601) 最弱，跌2.9%；其次係中國太平(966) 跌2.2%。
風聲鶴唳下，科網股繼續逆市熱炒。騰訊(700) 報495.6元，漲1.6元，半新股博雅互動(434) 報8.58元，大漲8%；雲遊(484) 收55.9元，急升6%；細股IGG(8002) 收6.07元，急升7%；第一視頻(082) 造1.36元，急升14%，累積差不多五成。
中移動(941) 宣佈就出售移動電視頻譜畀香港電視(1137) 進行內部調查，消息對中移動影響唔大，股價只係隨大市走軟，港視就跌咗近4%。收市後，港視發公告透露，已就行政長官會同行政會議，於2013年10月15日拒絕批准公司之本地免費電視節目服務牌照申請，提出司法覆核許可申請。
港視已算跌得少
兩單消息夾埋一齊睇，似乎對港視都唔係好消息。港視攞到流動電視牌照，曾引起外界猜測，係咪阿爺為了幫特區政府手，「鬆章」畀番個牌港視，現在睇嚟呢單嘢只係中移動想甩貨，匆忙間賣咗畀港視，到後來港視不獲發牌，事件先鬧大。中移動內部調查交易，就算唔影響港視到手的頻譜，但至少反映呢單嘢係無阿爺的祝福，咁即係話將來港視製作的節目，是否可以北上，有好大疑問。
家本地電視業同藝人市場價值，好大部份要睇內地市場，假如藝人喺內地無知名度，基本上吸金能力好弱，無論商演以至代言都無乜好路數，對好多藝人嚟講，只係能夠做香港市場，等如係打困龍，咁樣對香港電視吸引藝人加盟有好大障礙，唔好講佢拍的節目少咗個好大的賣埠市場。從中移動內部調查到港視告政府，都反映集團發展電視業務，仲係關卡重重，但隨着取得流動電視頻譜，重新招聘員工同啟動電視城工程，未來集團再進入燒錢期，呢個係背城借一的策略，簡單講「得就得、唔得就弗得」。從呢個角度睇，股價跌4%就真係絕對唔算多！
陸羽仁
金融High Tea 舊文
