人生如搞公司４
2014/2/13 上午 10:00:09
網誌分類: 經濟
美股升得多在抖氣中。標普500指數6日內升了4.5%，昨日全日在呆滯中渡過，收市微跌唔夠半點，收報1819點，杜指跌31點至15964點。
黃金近日表現唔錯，聯儲局主席耶倫上日發表講話，退市繼續，亦同時維持低息利率環境變，緩解投資者對利率可能飆高的憂慮。再加上印度首相表示會考慮放寬黃金進口，令金價有番些支持。印度1月份的黃金進口量較往常月份平均少了77%。
不過投資者唔好以為金價已見底兩貿貿然大舉出擊喎。黃金可能只係跌得多之後反彈一下，唔係轉勢。瑞信貴金屬調研部門主管Tom Kendall日前接受cnbc.com訪問時表示，黃金有可能升上每安士1300美元，但下跌的勢態維持不變，尤其係美國經濟現時比較疲弱，利率也在上升當中。美國10年債券收益率昨日回升至接近2.7厘附近。預計黃金年底會跌至接近1000美元水平，去番2009年秋季時候的水平。
事實上，即使美國經濟好轉，金價都未必會回升，原因係好基金經理唔需要再買黃金對沖股市或者避難。金價失去支撐力，這亦是去年3月底至7月時金價勁跌了近25%的主要原因。當時市場憧憬美國經濟正在強勁復甦，吸引大量資金由金市回流到股市。
昨日講到投資唔係講冧把、講測市，係講方法，要分清「投資的我」和「投機的我」。由於「投資的我」和「投機的我」的分別過去講咗好多，今次唔再講，主要講如何定出兩者佔組合的比例。
如何定出投資和投機佔組合中的比例，主要睇年齡和風險胃納，年紀輕，可以投機多啲，年紀大，投機只能佔少數，原理好簡單，年輕時萬一輸清就可以搵番，年老時輸清就搵唔番，好易放棄自己。昨日有單新聞，話去年底香港有712個有登記露宿者，當中有2%係大學生，照計數即係有14人。在這個超低失業率的年代，你肯做無需露宿，肯洗碗一定賺到13000元一個月，你唔肯做又另計(大學生可能更唔願做洗碗紥鐵)。若果你曾有1000萬身家，到50歲輸清，叫你從頭來過好難啦，就會放棄自己。所以年紀有番咁上下，千祈唔好全副身家去投機，以免要露宿。
另一個決定投機佔比例的因素是風險胃納，有人唔鐘意投機，有人好鐘意投機，這可能和大腦結構有關，有人腦下垂體特別發達，唔投機唔舒服，咁可以投機多啲，有人投咗機瞓唔著，咁即使25歲都無謂投機啦。
總體而言，投機比例隨年齡漸減，到40歲以後，一定唔好超過組合的50%投機，點解係40歲? 因為40係步入中年的明顯分水嶺，老花都係由40開始。過咗50，投機都唔好超過組合的30%啦。只要分清投機與投資，投機的我識止蝕，投資的我識係在低位買，組合一年回報10%以上機會不低，呢個數字已適合35歲以上人士的需求，記住要求回報愈高，風險也隨之上升。
最後講多一點，是所謂低買高沽的高沽，問題是長揸的股票沽不沽? 我判斷呢幾年都係上落市，所以我在股市較高時係會沽的，但只要唔係超高，不會沽清，例如去年判斷個市在19000、20000點至24000、25000點中間走，結果在高位只是沽了三分之二，另外三分之一係想等到2014年初出現超高位時才沽，結果無出現就無沽。點解唔全進全出，因為人經常會睇錯，所以都係留有餘地好啲。好似剛過去的低位，就買咗三分一，主要係大陸指數基金，唔一注瞓身入，怕佢過農曆年後再跌，結果無跌，又不妨等吓先。
呢啲做法唔會發達，亦唔會輸清，幻想你管理一間公司的大筆資金，你就唔會咁冒險，回報唔會好高，但穩陣啲。
陸羽仁
回應(0) 我想回應
陸羽仁 BLOG 舊文
