內房炒業績
2014年02月13日
聯儲局主席耶倫表明示超低息政策未變，帶動港股繼續反彈，地產股終於向上。新地(016) 微升0.31%報95.6元；長實(001) 揚2%報116.6元；恒地(012) 、新世界(017) 都漲3%。
香港人保值，一向偏向買股買樓，兩者比較，仲係鍾情買樓多啲。近日春節樓市靜靜哋，業主心態轉軟，好多人開始出動睇樓，議價空間多咗，好多人問現時係咪買樓時間。好多人話樓宇需求大，供應短期好難大增，呢點係事實，同時，陸羽仁覺得，政府雙辣招，樓市基本上無得短炒，一旦形成跌勢，唔容易博反彈，故此莫買當頭跌，似乎穩陣啲。
人同此心，地政總署係過年後首度公佈賣地結果，屯門兩幅限量住宅地的招標結果，分別由新地(016) 及南豐投得，合共總地價約8.86億元，市場形容為中標價遜預期。
由新地買入的屯門良德街第509號地皮，由新地以4.3億元中標，折合每呎樓面地價約2571元，雖然咁講，但以而家建築成本計，將來賣樓可能都要七、八千元一方呎。至於同區規模較大的508號地皮，則由南豐以4.56億元投得，折合每呎樓面地價2139元。
港樓出現當頭跌
陸羽仁聽聞，係過去半年，大地產商投地好多都縮晒手，出價遠低於市價，所以好多次開標，中標者不是中資就是中小財團，大地產商買地相對少，今次新地中標，間接反映咗大家都唔敢咁勇，故此出價保守的大財團都可以中標，顯示供應較多的新界樓，已經守唔到高價。
新地過去一年高價係124.7元，現價已經調整咗兩成，如果同歷史高價比，調整幅度超過三成，顯示地產股比樓價快一步調整，相信消息對股價衝擊不會太大，但由於短期樓價仍可能尋底，地產股都係有反彈、無升幅。
中美股市近日送爽，港股高開94點，隨着內地公佈出口數據遠勝預期，恒指愈升愈有，重上22200關，A股全日反覆高收，港股尾市曾高見22308點，收市仍報22285，升322點；國企指數收報9996，升139點，成交增至760億元。
多間內房公佈首月銷售數據標青，內房股幾乎全線上揚。中國海外(688) 1月份物業銷售按年升3.3%，股價大漲7%報22.3元；華潤置地(1109) 揚5%報19.16元，中國海外及潤地為藍籌升幅榜頭兩位股份。
中煤出局衰到貼
內地房策宏觀情況仍然不利，但去年內地樓價升幅甚勁，稍後內房股公佈業績，應該都仲幾靚仔，由於股價唔算好高，有條件偷步炒業績，不過，炒完靚靚業績，又要回歸到市場現實，唔知今年市況係點，故此炒業績要記得睇住時間落車收割。
法國達能集團增持蒙牛乳業(2319) 股權，每股作價較蒙牛前收市價36.85元高15%，蒙牛股價應聲造好，曾見40.35元，收報37.95元。收市後恒生指數有限公司宣佈季度檢討結果，成份股加入蒙牛，剔除中煤能源(1898) 。
中煤被踢出成份股係預期之內，反而蒙牛成為新貴有小小爆冷，變成雙喜臨門。如果今日個市好，佢或者有機會再衝一段。中煤早前已經盈警，今次再被剔出成份股，可以話禍不單行，假如有一輪沽售，不妨低位吼吓博佢會唔會否極泰來。
陸羽仁
金融High Tea 舊文
