無望城市(２)
2014/2/28 上午 10:08:53
網誌分類: 經濟
我話香港變無望城市，惹起一些網友迴嚮，有人贊成，有人覺得我講得誇張。
我主要從股市透射經濟，不及其餘，但呢個角度都應該睇到啲嘢。
股票要長炒長有，唔可以只靠吹只靠搭棚，去到最終都要生意得先至得。我地睇吓而家有乜股票得，網股以騰訊(700)
，內地公司，內地市場，其實除咗在香港上市之外，一切同香港無乜關係。另一類係賭股，以銀娛(0027)為首，香港公司，澳門市場，除咗大老闆和股東賺咗錢之外，其他亦同香港無關。 香港仲有乜嘢產業公司值得投資? 早兩年仲話炒吓自由行，炒吓莎莎，如今話香港零售銷售開始放緩，連呢啲公司股票都開始唔得。本地地產又唔得，銀行又普通，港口衰在唔在講，電訊食完早兩年iPhone熱潮又開始榭。都唔好講再早十年八年好多在內地有廠的製造業公司仍然得，而家做廠都俾台灣的大規模巨型廠搶曬，做廠亦做唔大。香港陷入一個週身刀，無張利的境界，無股好炒，係呢個現象的延伸。
香港而家仲食緊唔係消化得了的自由行，香港仲食緊金融業，但你去上海睇睇你都驚，千祈唔好望中國太快開放人民幣匯價，除咗好愛國咁關心開放咗頂唔頂得順老外的狙擊之外，我更擔心一開放香港的金融生意飛走曬。
香港而家守住副身家，有少少吃老本feel，咁又吃得幾耐呢?
美股昨日擺脫了連日來車前褪後的悶局，先跌後升，之後一路向上，標普500指數成功刷新歷史最高收市紀錄，收1854點，漲9點；杜指升74點，收報16273點；納指漲27點，造4319點。
美國昨日公布的經濟數據唔係幾靚仔，12月耐用品訂單由原先的跌4.2%，向下修正至跌5.3%，1月受飛機訂單大跌7.2%拖累，1月再跌1%。另外，最近一周的首次申領失業救濟金人數意外地攀升至34.8萬人，差過市場預期的33.5萬。
烏克蘭局勢再度緊張，烏克蘭克里米亞地區親俄的武裝分子控制了議會與當地政府辦公室，擔心俄羅斯可能会幹預烏克蘭局勢，打擊了投資氣氛。歐洲股市偏軟，美股開市亦唔得。至聯儲局主席耶倫出席國會聽證會，開始發言，大市開始反彈。
其實，耶倫在聽證會上除了表示美國近期經濟表現麻麻，嚴峻的天氣影響，至於影響有幾深，需要較長時間研究，她保持了過往的調子，對於聯儲局的後續行動，沒有提出什麼新意。不過，分析普遍認為，投資者唔一定需要耶倫表現得更加「鴿派」，只要唔係更「鷹」，對投資者嚟講，已經係一劑定心丸。加上耶倫話聯儲局買債的政策，並非一個預設過程(preset course)，即係話，在有需要的時候，聯儲局會調整買債規模，為退市「剎剎車」都未定。大市馬上由跌轉升。
另外，大市回升與日圓兌美元轉弱，有利沽日圓買美元的利差交易，不無關係。美元兌日圓朝早升上101.7日圓，其後回軟至102.2日圓。日圓便宜些，投資者手上又有多些資本投資美股。
陸羽仁
回應(8) 我想回應
陸羽仁 BLOG 舊文
