大合奏
2014年02月28日
港交所(388) 公佈業績，成績表初步叫做OK，中環茶友嘅話題係，有報道指行政總裁又大加人工，包括收取股份獎勵。有茶友話，華爾街投行猛發花紅畀高層，曾經成為社會關注事件，港交所情況仲未去到咁，高層薪酬升幅，都令人關注。呢個現象同時發生喺領匯(823) 、港鐵(066) 等非家族公司身上，除了薪酬猛增外，呢啲公司會唔會出現為了令管理層高薪顯得合理化，就諸多動作，都值得股東關注。
茶友話，港交所高層薪酬豐厚，唔係第一日，前任行政總裁周文耀退任時，手頭持有的港交所股份價值幾億。不過，當時周總的股份係透過認股權獲取，由於佢任內港交所股票升過不停，令他身家水漲船高，同期其他高層，個個都肥過飲咗肥仔水。從股東而言，認股權上升係公司股價有表現，股東都有得益，但現時港交所似乎就唔係咁情況，故此外界慢慢就有議論啦！
管理層加薪有議論
同樣情況都好似出現喺其他無控制性股東的公司身上，好似領匯呢兩年高層薪酬都大幅上漲。領匯雖然管緊幾百億資產，但主要係租務同翻新工程，睇落似乎唔係咁複雜啫，收租房託點解要咁高薪，同其他公司比又係如何，值得比較一下。唔知係咪因為咁，所以領匯管理層好似特別進取，本來搞緊香港房委會分拆出來的商場，跟住就收購私人商場，搞搞吓仲話要北上?，搞到咁勇本來唔係壞事，但就同當初分拆出來的原意，好似有小小唔同，或者係有啲急進咗嘅感覺囉。
喺金融海嘯前，華爾街的投資銀行家，為咗獲取高薪及天文數字花紅，有人搞出有毒產品，有人四出併購，結果有啲修成正果，更多係搞到一鑊泡，不過出事之後，呢啲高層已經袋袋平安走咗人。香港上市公司由於大部份係家族公司，畀幾多人工有大股東睇住，呢種情況以前唔算普遍，希望以後亦都唔好啦。茶友話，畀高人工點講都有數得計，仲係事小，最驚就係管理層為了證明自己價值，作出過份大膽的投資，萬一搞出大頭佛，咁條數就唔知點計嘞。
科網不停爆上
幾個大板塊昨日大合奏，齊齊抽高，兩大強勢類股份科網同濠賭一齊爆上。騰訊(700) 升穿600元大關後，午後愈升愈有，逼近620元，收報616.5元，勁升逾5%，成交金額58.18億元。舜宇光學(2382) 獲Google(谷歌)欽點，成為Project Tango計劃合作夥伴之一，早前再獲高盛及野村重申「買入」評級，舜宇兩連捷，收市飆升7.46%，報7.49元，揚0.52元，成交金額1.63億元，仲有就係中石化系表現標青。中石化(386) 董事長傅成玉透露，「兩會」期間會有進一步改革消息，中石化AH股再受追捧，收報6.99元，升5.27%，係表現最好藍籌之一，旗下上石化(338) 、中石化冠德(934) 都造好，呢啲股份價錢唔貴，有茶友覺得短期仲有機會再炒。
喺多路催谷下，港股期結日造好，收復250天牛熊線(22469) 及50天線(22603) ，重返22800收市。
恒生指數收報22828，升390點；國企指數收報9957，升151點，成交金額由昨日的638億元，增加至732億元。大市挾高結算定係真好，真係要睇多兩日至知。
陸羽仁
金融High Tea 舊文
