買樓要避當頭跌
2014年02月07日
港股經歷三連挫後，在內地股市春節假期復市前夕終見反彈，恒生指數周四全日上升153點收市，報21423。然而，港股昨日之升市亦非一帆風順，午後升幅一度縮至8點，但臨近尾市再發力抽上，逼近全日高位收市。國企指數升67點報9537，幅度與恒指相若。不過，大市交投則進一步收縮至600億元以下，由周三的653.6億元跌至583.7億元。
於過去一段時間，藍籌股彷彿僅剩下騰訊控股(700) 、金沙中國(1928) 、銀河娛樂(027) 及聯想(992) 數隻股份似的，每日的藍籌榜首及榜尾差不多都由這幾隻股份包辦。受到1月份澳門博彩收入唔及預期的利淡消息打擊，金沙及銀娛亦挫逾7%，成為了周三跌幅最大的兩隻藍籌。及至昨日，大行紛紛出來為濠賭股護航，賭股即時全面翻生，市值四千多億元的龍頭金沙，一下子報復式反彈10.89%，不僅冠絕藍籌，亦跑贏一眾濠賭股，其震撼程度絕不比聯想於周二大插16.4%的轟烈場面遜色；銀娛昨亦勁升7.32%，兩隻賭股已合共為恒指進帳80點，佔去昨日大市升幅的一半。
濠賭股全翻生
前後才一日，金沙與銀娛便由周三的榜尾升返上榜首，近期動輒出現十個八個巴仙的上落幅度，心血小一點的投資者都會被Chok到氣咳，完全不能以持有傳統大藍籌的態度來對待之。其他濠賭股方面，澳博(880) 彈6.03%，永利澳門(1128) 升3.91%，美高梅中國(2282) 飆7.5%，新濠國際(200) 勁漲8.02%，新濠博亞亦升3.95%。
高盛、德銀、匯豐及巴克萊齊齊出來力挺，成為濠賭股昨日反底的主要動力。由此亦可見到，於現時的疲弱市況下，大行報告主導股份表現的趨勢可說是愈見明顯，是好是壞實屬難言。
另外，阿里巴巴借殼上市的憧憬近乎徹底幻滅，中信21世紀(241) 股價急瀉逾兩成，為港股跌幅最大股份，全日大插24.13%收市，收報2.61元。與阿里巴巴入主消息公佈後、復牌開出來的高位5元相比，中信21世紀現價足足跌去近半，但比起停牌前的0.83元比較，則仍有2.14倍的升幅，要再跌的話，仍然可以相當兇殘。
話說，有個世侄過年上門探望，共話新春。世侄剛拉埋天窗，兩口子心願之一，是成家之後可以立室，有自己嘅安樂窩，佢見近日樓市靜了下來，心思思想入市，講出自己想法之餘，自然順便問吓點睇？
過去幾十年，香港樓價反覆上升，置業自用可以講從來無壞，但若然在高位入市，遇正市況回調，短期損失都幾痛苦，九七後的樓市大蕭條，搞到好多年輕夫妻為樓反目，最後物業變成「勞燕分飛盤」，為求分手不惜賤賣計數，落得喺最低位出貨，從呢個角度講，喺市況高位入市，真係要諗過度過，不宜輕率。
本地樓價高企，政府想調控樓價，誠意不用懷疑，問題係做唔做得到而已，尤其現屆政府心頭好高，既想樓價跌、又不想樓價跌得太多，最好係跌番兩、三成，咁就啱啱好嘞，問題係樓價無得學似揸電梯咁，想喺邊處停就喺邊停，你想佢跌兩成，佢一係唔跌，一跌就跌過龍。正如梁班子上場，想樓價回順，結果佢不跌反升，?家就算跌足兩成，都係還原基本步，難怪世侄等兩等，個市回軟，已經心急想入市。
開井等人飲水
世侄想成全買樓夢，但又怕買貴樓，問陸羽仁點睇？我話若果你等得，就不妨等多陣囉，因為樓價?家止跌，但仲未跌得好多，至少未跌到政府希望的水平。而家樓價跌，但買家要畀這樣或那樣的稅，基本上錢都去了庫房，買家真正得益有限，喺咁情況下，當局的辣招應該唔會咁快撤銷，喺干預之下，樓價沒有回升空間，最後甚至可能回落。
世侄話，佢都係咁樣睇，關鍵係內地人咁多，人民幣又係咁升值，佢驚樓價再跌，就會吸引內地人蜂擁落嚟買樓，屆時就算有境外買家稅，佢都驚唔夠內地人搶。世侄呢個擔心，唔可以話無道理，尤其政府要微調樓價，想佢跌又唔想跌得多，如果樓價跌政府唔加辣，唔係會唔會引發內地買家入市搶購，咁就開埋個井等人飲水嘞。不過，世侄可以睇住內地人繳交印花稅的數字嚟做人，見到佢哋買樓數字回升，先再考慮是否入市。畢竟現在樓價先開始露出調整勢頭，係不買當頭跌的道理下，又點解唔等多陣先呢？
陸羽仁
金融High Tea 舊文
