魚樂無窮：低殘板塊勿忘零售股 - 唐牛
■如果buy零售板塊會翻叮，不妨留意佐丹奴。
米粉節一如預期熱爆，根據官方微博數字，半日喪賣130萬部小米及紅米手機，總值超過15億人仔。
比著以前科網狂潮，小米概念股升少過一成，大家都唔會滿意，但噚日埋單金山軟件(3888)僅升3.7%，通達(698)及飛毛腿(1399)更只得1%升幅，認真奀豬，亦反映高位蟹貨數以籮計。
低殘股成為近期投資主流，舊經濟股相繼落鑊，下一個板塊會炒乜？唐牛就買重零售股。無他，零售股近年受租金貴、人工高、基數大、庫存勁四大因素困擾，可謂無啖好食，業績增長明顯放緩，股價亦拾級而下。不過，嚟緊復活節及五一小黃金周，有望成為零售股催化劑。噚日化妝品股莎莎(178)已起動，如果buy呢個板塊會翻叮，不妨留意佐丹奴(709)。
佐丹奴短炒睇6元
佐丹奴舊年8月於8.66元水平見頂，其後冇段好睇，上月最低曾見4.81元，累積跌幅達44%，認真慘情。經歷重創後，投資價值徐徐浮現，彭博綜合券商預測，佐丹奴今年市盈率11.7倍，較過去五年平均嘅13.6倍折讓14%，抵！公司出名高息，經過一輪調整後，息率高達7.8厘，正！
最關鍵之處在於主席劉國權近期罕有增持，平均價介乎4.859至5.017元，雖然一球貨唔夠，但象徵意義重大，睇番2012年劉國權出手掃貨後，佐丹奴隨即見底，之後仲展開大升浪，強！咁多利好因素支持，短炒先睇6蚊。
唐牛
上一則: 炒友Blog：中通信弱股可望翻身 - 邱古奇
下一則: 股場放大鏡：比亞迪電子估值吸引 - 歐陽風
魚樂無窮 - 唐牛 舊文
