輪流點燈
2014年04月10日
唔信佢又升、唔信佢大升，港股升升吓，昨日再升246點，收報22843，指數仲一度逼近兩萬三千點，早前做落的淡倉盤，到咗呢個水平，又被大戶殺咗一浸。呢幾日美股調整，港股照樣抽高，可見大戶揸𨋢技術過人。
阿爺?頭 炒友高興
港股突然之間同美股好似脫咗鈎，主要係炒阿爺救市。自從人民幣上個月開始轉弱，傳出咗中央壓匯價托經濟的說法，港股就開始轉弱為強。
內地接連有經濟數據出台，市場憧憬穩增長措施本月密集出台，滬深股市已經連續三日造好。上證指數收市重上2100關，報2105點，升6點，是2月21日以來最高，內地股民預期數據唔好，阿爺會出手救市，反而變成「利好消息」。
指數可以反覆上試阻力，主要係各類股份逐瓣炒吓，昨日匯控(005) 及騰訊(700) 為升市主力，合共撐起恒指85點，同時令恒指跑番贏國指。
另外，龍源電力(916) 首三月完成發電量841萬兆瓦時，按年增長3.26%，股價大力抽高8.9%，收報8.27元，升幅是國指成份股最大；仲帶動一批新能源同風電股，風電設備股的金風科技(2208) 升咗近7%；華能新能源(958) 就升8.6%。
呢啲唔同類型股份逐瓣炒，表面有不同理由解釋，但好似龍源上個月先插佢業績唔掂，隊落低位，家突然話佢發電量對辦，咁係咪有啲牽強先？如果要講真正理由，實情應該係基金舊年起睇淡中國，全線減咗磅，家有番啲錢回流，就樣樣買番啲貨，搞到中資股輪流點燈，逐瓣炒吓，大戶要砌番高指數就唔係咁難。
今年初，中共舉行三中全會，之後政府訂出今年增長7.5%的目標。至於點樣可以做到指標，阿爺無具體講到。陸羽仁有機會同熟悉內地政策的人士傾過，佢都同意阿爺要帶動經濟，的確無以前咁得心應手，因為以前只要起吓路、搞下建設，咁就可以達標，但家基建好多都造咗，幾年前中央四萬億提振經濟的計劃，已被質疑重複建設，不符效益，所以點樣可以確保增長，阿爺真係幾?頭。
要搵好辦法催谷經濟唔易，但如果標準放低啲，唔要求咁高效益，咁又唔係咁難做到嘅，畢竟中國政府自己可以印銀紙，手頭又大把資產，有好多資源可以運用。
自從三中全會以來，時間過得好快，第一季已經過去，話咁快第二季都會過埋，如果再唔出招搞吓經濟，今年要達到7.5%的增長，就唔係咁容易。家市場就賭緊，中央會開始心急，會加快推出各項措施嚟刺激經濟。正因為咁樣，炒家仲暗暗偷笑，覺得愈多唔靚數字出台，愈有可能迫到阿爺出招。
內房趁機炒番陣
中央要穩住經濟，其中一個方法就係減少對房地產的打壓。近幾個月，已經聽唔到調控樓市的聲音，有說領導層現時認為要管住樓價係不切現實，要管理國人居住問題，應該係集中精力搞好保障房，內房股呢排借勢反彈，部份大行就睇完業績後出吓推介報告。
啱啱瑞信發表報告，話恒大(3333) 上月銷售比估計強勁，上月銷售按月增15%，按年升66%，首季銷售達305億元人民幣。
該行對恒大次季銷售充滿信心，當中大量一線城市項目推出。若銷售進一步改善，料2014至2015年業績仍有上升空間，維持「跑贏大市」評級，目標價由4.1元升至4.3元。
陸羽仁
金融High Tea 舊文
