中環在線：年初踩樓市突3,000萬買舖蘇民峰洩天機？ - 李華華
■蘇民峰話香港樓市喺2016年前冇運行，但近排突然買咗個地舖。
堪輿學家蘇民峰出名投資物業有道，佢今年初先講過香港樓市喺2016年前冇運行，佢會等2016年先出擊，點知轉過頭，佢最近就花3,000萬元買入中環堅道一個千呎地舖。蘇師傅講一套、做一套，唔通突然算到有乜天機？
蘇師傅今年2月提過，香港樓市2016年前都唔會有運行，佢手頭唔少舖位都係2009年前買入，𠵱家會靜待時機，2016年先再出擊。
講係咁講，但土地註冊處最新資料顯示，蘇師傅持有嘅「運峰有限公司」喺4月10日，以3,000萬元買入中環堅道添寶閣地下45號一個地舖。地產代理話，呢個舖建築面積約1,000方呎，呎價3萬元，屬於市價，家陣租緊畀一間足浴按摩店，月租6.5萬元，租金回報率2.6厘。
■蘇民峰買嘅中環地舖，現為足浴店(藍框示)。陳奕釗攝
鍾情中環舖買多過沽
蘇師傅買入呢個舖位，隔籬有間茶餐廳，翻查資料，都係屬於蘇師傅㗎喎，佢早於2005年以1,238萬元，買入呢個43號地舖，可惜中間夾住幢住宅嘅出入口，冇法打通去用。
查實蘇師傅幾鍾意投資中環舖，喺嗰度仲持有幾個地舖，分佈堅道同些利街等，唔通嗰邊風水真係咁好？佢唯一沽咗嘅只係伊利近街11號地下連閣樓，2005年以880萬元買入，兩年後以1,550萬元沽出，賬面賺670萬元。
同樣有投資物業嘅麥玲玲師傅就話，投資都係睇大環境，未必一定事前算過，𠵱家個市回回哋，遇到靚貨，佢都會入市㗎。
李華華
mailto:LiWaWa@AppleDaily.com
上一則: 國策解碼：反腐恐掀國企降級潮
下一則: 中環在線：阿里上市造勢紀錄片5月全球播 - 李華華
中環在線 - 李華華 舊文
