異動空間：炒股燒錢方程式 - 魏力
噚日提到魏力個倉揸到廿幾隻股票後，完全兼顧唔到，個市逆轉就兵敗如山倒。咁究竟揸幾多隻先啱？純粹個人分享，可視乎三個因素：資金、時間、市況。
一般魏力每隻股最多買五分之一錢，假設瞓身入市(零現金、零孖展)，最多就係買五隻。但隨住個倉變大，20%都已經好多錢，可以分散一點，但個人經驗係通常10隻以上已開始吃力，盤路睇唔實，幅圖穿咗位又唔知，咁就要減少持股數目。時間方面，職業炒家全天候mon實，多炒幾隻都ok，業餘散戶又返工又開會，揸五隻差唔多。市況暢旺時，可分啲錢博二三線，但好似家陣個市，揸少隻少一分風險。見一個愛一個，叫花心；見一隻炒一隻，叫貪心，兩者同樣是燒錢行為，因為上得山多終遇虎。
吹完水，畀幅好圖大家，泰坦能源(2188)悶市破位，成交上力，MACD轉番雙牛，有條件爆上1.5元。去年轉蝕3,381萬銀，股價不跌反升，預示業績翻身。阿爺力谷電動車，充電樁供不應求，分析指今年全國充電樁招標料近30億人仔，以泰坦平均市佔率10%計，可獲3億銀新單，已較去年收入多近倍，潛力不容忽視。
魏力
http://www.facebook.com/2012jason
上一則: 何車500：中自化價殘值博 - 何車
下一則: 青心直說：大型IPO死因 - 胡孟青
異動空間 - 魏力 舊文
