反貪大風暴
2014年04月23日
放完假港股仲係唔算太有氣氛，午後宣佈下調農村金融機構存款準備金率，但對中港股市幫助唔大。恒生指數最多升48點，午後倒跌最多116點，低見22644點。尾市受惠於人行下調農村金融機構存準金的利好消息，大市短暫倒升，最終收報22730點，跌29點；國企指數收報10030點，跌49點，成交只有482億元。
短炒華潤要防再插
假前傳出華潤集團董事長宋林被查，該系股份即時受壓，股價再跌，旗下五間本港上市公司全軍覆沒，其中華潤電力(836) 表現最差，遭瑞信降其評級至「中性」，潤電收報18.98元，重創10%，為表現最差藍籌；華潤置地(1109) 也挫3%；華潤創業(291) 、華潤水泥(1313) 插超過4.1%；華潤燃氣(1193) 跌近3%。
中環茶友講起，過往遇着呢啲急跌情況，都係低撈機會，反正國企大股東係政府，「鐵打的衙門、流水的官」，高層人事有變，照計唔應該影響公司長遠發展㗎，如果係咁，係咪應該可以博反彈呢？
過去，國企高層出事，夠膽人沽我買者，的確好多時賺到快錢，陸羽仁都試過咁樣執過幾劑零用錢。今次華潤系幾位股價碌低，短期或者有反彈唔出奇，但同一時間，都要提防佢彈完再碌，咁即係話要賺快錢，唔可以低估其中難度。
點解陸羽仁會咁講呢？首先，大家可能唔知，雖然宋林係國企老總，但佢唔似好多老總，喺不同企業調來調去，佢多年來都喺華潤工作。本來，華潤係國務院屬下在港經營出入口的單位，但自從鄧小平南巡後，華潤積極轉型，業務同資產不斷拓展，由原先經營出入口貿易，逐步涉足零售、地產、電力、燃氣，有人粗略計算過，由宋林上場起，集團資產大約由三千多億元，攀升至過萬億元，有三間公司躋身恒生指數成份股。宋林究竟用乜辦法令到公司迅速壯大，外界好難深究，佢家下咗馬，影響外界同樣唔係咁易睇得清楚，當無咗長期領導集團發展的高層下馬，係咪真係咁快可以當無事呢？
要留意嘅係，早前內地有調查，華潤係國企實力排名五大之內，其餘幾間公司單係中石油(857) 、中海油(883) 、中石化(386) 呢「三桶油」已佔咗幾個位，仲有就係電訊龍頭中移動(941) 。呢啲排名好多時唔使太真看待，不過，華潤資產龐大，但經營業務唔係好似「三桶油」、中移動呢類有政策保護的行業，而係競爭性都幾大的零售、地產業。好似華創搞啤酒業，要同青島、燕京爭市場，一打啤酒毛利只有五毛錢，喺咁環境下，管理層穩唔穩定，影響就同壟斷性行業好唔同。
萬洲上市去得就去
其實，買股值博率好多時都同股價平貴有關。華潤過去增長快，故此系內公司普遍享有溢價，早排股價都仲升緊，直至過去幾個交易日至受消息影響急插，由於插得急或者會有反彈，不過就與其他茶渣價買股唔係幾同，大家要博短線，都要做好執生準備。
市場近日對新股胃口麻麻，有市場消息稱，由於反應疲弱，於昨日中午截止認購的新股萬洲國際(288) 的承銷團於午間已對外發出訊息，指會重定招股條款，故會延遲定價時間。據湯森路透旗下《IFR》引述消息指出，萬洲將削減集資規模，同時改為不賣舊股，只發新股。市況唔就，公司肯變吓招係務實做法，咁亦證明咗大股東認為，都係上咗市先好啲！
陸羽仁
金融High Tea 舊文
