預咗加息
2014/4/30 8:24:1
網誌分類: 經濟
科網股反彈，結束連跌5日的頹勢；醫保行業繼續傳出併購消息，提振市場氣氛。愈來愈多的美企公佈完業績，雖然好多企業盈利已於早前下調了，造出盈利好過市場預期的「假像」，但對大市仍起到一定的支撐作用。
杜指升87點至16535點；標普500指數漲9點，收1878點；納指升29點，造4104點。
美國經濟數據麻麻，4月消費者信心指數下降至82.3，差過市場預期的83.3；2月凱斯席勒20大地市房價指數年率升12.9%，亦略為差過預期的13%。全賴企業併購消息刺激及科網股反彈，支撐頂住大市。
繼上日有兩家醫保產品企業傳出收購消息，家居護理產品生產商英國利潔時(Reckitt Benckiser)確認正在洽商收購默克(Merck)的消費者醫療保健業務。對於併購活動，市場普遍認為係市況良好的跡象，因為意味著企業願意，而且有能力提供大量現金或者股票，去發展業務，係睇好後市的表現。默克昨日公佈業績，盈利勝預期，營收唔掂，但有收購消息支撐，股價升3.6%，亦帶動醫保板塊升0.6%。
近期跌得好慘烈嘅能動股以及科網股昨日反彈。其中Facebook及LinkedIn齊漲逾3.5%，領漲納指。推特(Twitter)交易時段收高4.6%。推特收市後公佈首季業績，活躍用戶達到2.55億，較去年增長25%，期內營收亦較去年上升一倍至2.5億美元，略差過預期的2.4億。廣告收入2.26億美元，八成來自手機廣告。但盈利狀況慘不忍睹，全季勁蝕1.32億美元，遠差過市場預期的蝕0.27億美元。公佈業績後，推特股價在延長交易時段內插水超過一成一至37.9美元，創了去年11月上市以來新低。安碩納斯達克生化科持指數基金(iShares Nasdaq Biotechnology ETF)反彈2.7%。
聯儲局今日將結束為期兩日的議息會議，中午公布議息結果。市場預期聯儲局會維持削減購債規模的步伐不變，每月的購債規模，再減100億美元至每月450億美元。聯儲局持續收水，市場已經預咗，如果規模上冇出人意表的大改變，對大市唔會造成影響。投資者現時比較關注的是利息走向。亦係近期左右大市的主要力量。
聯儲局3月議息會議後，主席耶倫表示或會於終止QE後六個月開始加息，即時嚇到市場腳軟，大市跪低。聯儲局後來不斷放出「鴿派」言論補鑊，緩和市場對提早加息的恐慌，才穩住大市。據CNBC 4月做嘅聯儲局調研(Fed Survey)結果顯示，華爾街受訪者普遍預期2015年底聯儲局基準利率會係1厘，而3月則預期0.83厘。市場對加息預期在升溫。但大市未見調整，除咗科網股同近期升得好勁的能動股外，其係板塊跌咗落去，好快又彈番上嚟。反映投資者已適應了加息呢個大趨勢。
市場雖然預期聯儲局唔會對現行的貨幣政策作出太大改變，但仍對耶倫在議息會議後的講話，態度審慎。投資者對市場上不確定性因素，特別犯忌。而投資者現時對聯儲局的貨幣政策走向的感覺卻比較混淆，主要原因係覺得耶倫上台後，聯儲局政策的透明度，唔及伯南克時代。呢個情況可以從聯儲局調研結果睇到，受訪者對耶倫的總評分為B-，伯南克為B，評價差過伯南克。而佢失分的地方就係政策的透明度。分析指耶倫有點控制不了其政策訊息的傳遞過程，使市場有點不知所措。
陸羽仁
回應(1) 我想回應
陸羽仁 BLOG 舊文
