成地眼鏡
2014年04月30日
港股結算日，出現小奇蹟，五窮臨近，大家有小小腳仔軟之際，個市開出嚟企穩，去到下午臨收市仲抽高，如果見好睇好，見淡睇淡，已經被人打咗一巴。
舊經濟股突然發威
成班中環茶友話，個市咁樣升法，係唔係結算因素呢？尤其今次係重磅股發威，弱勢咗成季的中移動(941) 一下彈升3.2元，推升咗個市幾十點。但如果細睇，似乎又唔多似係結算托高咁簡單，因為通常結算托市，係開市即刻推高，去到三點鐘就放手。
從股民角度，昨日大市升，但都仲係幾個別吓，表現標青的主要係大件(唔知係唔係抵食)的舊經濟股，中資電訊股表現續亮麗，聯通(762) 飆6%，報11.24元，表現是藍籌最佳。
中資電訊股唔單止係大笨象，係科網股彈起的年代，甚至係大恐龍，係被其他新經濟企業狙擊的目標，好似中移動純利表現，已由高增長經歷低增長，家甚至出現倒退現象，前景唔見得特別好，故此佢股價呢兩日可以接連上升，在未搵到其他真正理由前，暫時只係可以視為資金流入低估值舊經濟股的現象。
除咗中資電訊股，內銀股昨日表現都唔弱，加埋匯控(005) 呢啲傳統股份力挺下，恒指一舉爆升逾300點，重上50天線收市，呢樣嘢真係搞到個市成地玻璃碎。
恒生指數收報22453點，升321點；國企指數收報9882點，升112點或1.15%，成交金額由昨日的528億元，增加至611.8億元。
呢幾日，最多新聞應該算是港鐵(066) ，爆完列車意外，又爆高鐵延遲，仲有高層落馬。不過，睇番股價似乎就暫時對股價唔係最大影響，佢股價過去一年最高係32.5元，呢個價差不多係去年中造出，跟住就一度回落，最低去過26.31元，呢個係今年2月左右出現，跟住股價已經反彈。
從走勢嚟睇，港鐵係半隻地產股，股價似乎受地產市道影響，多過受營運表現或新聞影響。去年頭雖然政府打壓樓價，但效果不彰，樓價不跌反升，於是帶動港鐵股價上升，到了今年樓價回落，市場較為憂慮，佢股價跟住下跌，呢兩個月見到政府無再出招打壓樓市，佢嘅股價就穩定下來，就算出現諸多壞消息，似乎仲未影響到投資者的信心。
港鐵怕樓跌多過怕官
聽會計界高人話，港鐵收入之中，有十幾億來自管理層同顧問費用，呢啲相信包括幫政府管理高鐵項目，至於港鐵做呢啲工程有無因為超支抑或疏忽被索償的風險呢？
年報似乎無交代，咁樣會唔會影響未來盈利呢？中環茶友就答，若然係外國經常打官司的地方，當然唔排除港鐵會被人告啦，但香港唔興呢家嘢喎，而且港鐵獨家之局唔係咁易打破，所以搞瓜幾個高管唔難，要搞瓜成家公司就唔係咁易，究竟家呢啲工程延誤有無索償風險，管理層最好交代吓啦。
不過，從過去經驗，港鐵唔怕官、只怕管，尤其係最怕管樓市，除咗呢樣，其他都唔係咁驚㗎咋。
陸羽仁
金融High Tea 舊文
