港交所能醫不自醫
2014年04月03日
港股在第二季衝完第一日後，昨日有少少唞氣跡象，不過市底都OK，大隻佬騰訊(700) 回咗0.4%，都算大漲小回啫，恒指升75點，收報22523點。昨日係地產股得，國企股回吐。
唔知係唔係香港同內地地產股都衰咗好耐，昨日兩地地產股都得，我估都係基金借啲意追落後，買番啲貨「責吓倉」。若論消息面，香港夾硬可以講吓政府唔再搞「港人港地」，但市場如果當呢個係好消息，就真係笨啦，都有雙辣招啦，仲使鬼搞乜嘢港人港地呀，呢啲只係梁振首選舉時的花招，並無實效，唔做亦無乜影響。
政府對地產市場，就好似阿媽打仔咁，開始時用枝雞毛掃抽兩嘢(就係港人港地啦)，個仔完全無反應。好，攞碌棍過嚟打鑊甘你先(即係雙辣招)，打一棍就搞掂晒，咁枝雞毛掃自然無用啦，唔使留戀佢啦。但若果話地產股因為無咗港人港地升，咁雙辣招點計？
地產股殺上追落後
長實(001) 昨日升3.3%、新地(016) 升4.1%、恒地(012) 升3.2%，除了長實外，地產股其實一直都幾弱，睇買盤的經紀牌有好多外資經紀，都係季初買貨追落後的感覺居多。
昨日有一隻奇股係港交所(388) ，上午唔郁，下午1點多開始抽升，到3點過後升得太急突然停牌，停牌前報126元，升6.5元，升幅5.4%。昨日其實一早內地《21世紀經濟報道》已有消息，指港交所與上海交易所已經就網絡互通達成共識，未來上交所將承接內地買賣港股，並集中轉交至港交所執行。海外機構亦可通過港交所，直接投資A股，由上交所負責執行，但尚未得悉相應投資額度。
報道指上交所已密鑼緊鼓籌備工程的技術研發，並已列入上交所2014年工作計劃。報道引述分析話，呢個改革對股價高的深交所創業板或造成不利影響，而對上交所股價較低的藍籌股有望得到提振，將為上交所帶來可觀的交易量。
嘩，呢個消息如果係真，係雙向直通車，內地買港股，海外買A股，雖然未知容許的交易量，但若容許有相當數量，就唔係嘢少。將對兩地股市都帶來十分正面的刺激，奇就奇在上午港交所股價無乜反應，要等到1點幾才抽高。
牌面分析兩地交易所係有料傾緊，未到真正公佈的時候，港交所見《21世紀經濟報道》隻古仔出街後，市場無反應，所以就唔停牌，到急升才停牌。港交所應該係有股價敏感嘢搞緊，否則唔使停牌，若然最後真係開《21世紀經濟報道》講的雙向直通，咁就要打屁股啦。港交所自己都監管上市公司，若然上市公司出咗咁重大股價敏感消息仲唔馬上停牌等出通告，仲要交易多半日，最後實俾港交所剷上天花板，但今次佢可能係能醫不自醫，識管人唔識管自己啦。
最後講講有隻證券股天行國際(993) 昨日大升92%，真係升到有少少得人驚。隻股1送9紅股，即係等如1拆10，前日收30.6元，昨日除淨，除淨價應該係3.06元，結果升到5.88元收市，炒到飛起。
分拆喪升打盲毛
大送紅股股價變細咗，原有股東對縮細咗的股價無乜概念，而紅股又要等到本月22日才派發，小股東無紅股在手，街貨有限，喪炒一番，真係好似打盲毛咁，呢啲遊戲普通人唔易玩呀。
陸羽仁
金融High Tea 舊文
