智取大市：置富穩陣基金至愛 - 晉佳
■趙國雄任主席的置富產業信託主要經營次線商場同停車場，做平民生意收入反而更加穩定。資料圖片
恒指繼續反彈，但係升跌股份參半，至於二、三線股反彈有一成半成左右就開始有沽壓，能夠跑出大炒特炒嘅股份，莫過於細價股，但亦寥寥可數。呢種情況究竟係震住倉咁升，定係反彈無力，都確係難以預測。要晉佳去估，依然係中長線偏淡，因為中資股資產質素問題、股票供應增加等等負面因素，有排未搞掂。至於新經濟股啱啱炒到爆咗，亦唔信元氣可以快速恢復，呢種環境難以吸引大戶低吸股票。
長線未似好轉，短線又難玩，目前市面上最容易贏錢，應該要數本地地產概念，要有得啄嚇，或者穩穩定定持有一排賺十個巴仙左右回報嘅機會，勉強仲有選擇。
先交代單近期傳聞，聯儲局前主席伯南克出席多場晚宴，同基金經理傾偈時講到，佢覺得有生之年，都唔會見到聯邦基金利率重返長期平均水平，即4厘左右，亦認為低息環境可以持續得比市場預期更耐。伯老咁講，大家當然求神拜佛保祐佢長命百歲。
伯老言論出咗後，大有真相大白之感。話說近期美股持續處於高位(唔計細價股)，同時美債孳息率一路係咁跌，劇本完全符合伯老所講。本地地產股、REIT近排股價都有好表現，亦反映上述市場預期，呢個利好效應，勁過啲乜嘢DSD鬆綁多多聲。如果低息環境持續，樓價較有支持，新盤亦可能順產，有多盤可賣嘅長實(001)，地產業務前景突然天朗氣清，攤佔埋和黃(013)嘅環球業務，總算係強得有道理。而同系REIT置富產業信託(778)，亦值得留意。
經營次線商場增長穩定
置富產業信託主要經營次線商場。投資呢類商場反而好過高檔商場，因為高檔嘢要驚內地打貪、經濟放緩，做平民生意收入增長更加穩定，周息率5.5厘似乎物有所值。
置富嚿年發行新基金單位，由17.05億個，增加到18.48億個，每單位盈利有所攤薄，但之後再以大部份借貸形式斥資58.49億元，收購嘉湖銀座商場，貸款息率最貴拆息加1.7厘，收購後掉番轉進一步提升咗每單位可分派金額。置富產業信託去年周息率5.5厘，每基金單位分派36仙，按年增長11.3%，總收益按年升18.3%，至13.18億元，表現未完全反映收購增加分派嘅效應。至於今年首季，由9.52仙降到9.04仙，但每單位分派就由9仙，升到去10.38仙。
市況難玩，基金錢要搵地方「捐」，又要帶頭盔，又有番少少概念升得嚇，置富算係好選擇。現時買入置富，仲比起去年7月發新單位作價6.82元仲要平，除非股市大跌，否則兩個月睇升一成絕對唔難，現價可買入。
晉佳
本欄逢周三刊登
上一則: 一周三件：AV Concept抵博 - 錢雋
下一則: Follow Me：粵投升呢有望見10元 - 高彰坡
智取大市 - 晉佳 舊文
