京東鬥阿里
2014/5/21 上午 09:50:46
網誌分類: 其他
美國零售股業績差過預期，拖累大市向下，杜指跌138點至16374點；標普500指數跌12點，收報1873點，標普500指數10大行業板塊全面下滑，包括辦公用品零售商Staples、美國最大的家居裝修用品連鎖家得寶(Home Depots)以及TJX Cos的業績差過預期，搞到零售股係咁插，TJX Cos跌7.6%，Staples 暴跌12.6%，服裝連銷Urban Outfitters 跌8.8%，電器連鎖百思買(Best Buy)跌5.6%，寵物用及用品連鎖PetSmart跌4.7%。
聯儲局今日將公開對上一次議息會議記錄，市場投資氣氛比較謹慎，成交清淡。昨日，費城聯儲主席普羅瑟及紐約聯儲主席達德利都就當局幾時會加息發表講話，普羅瑟一向呼籲聯儲局要盡快退出購買債券計劃，他認為聯儲局加息，應與經濟狀況掛鈎，不應該與日曆掛鈎。佢認為美國經濟正處於復甦開始以來最堅實的位置，不過，第一季經濟比較弱，今年要實現3%增長，仍有難度，至於失業率有可能在年底前降至6%以下。他又稱，聯儲最好在條件允許下儘早開始加息，如果經濟增長加速，利率則有必要提前上調。
達德利則預計今年秋天，QE將會終結。佢無明確講幾時加息，但指出開始加息後，加息的軌跡「可能相對緩慢」，這既依賴於屆時經濟的表現如何，也取決於金融狀況會作出何種反應。意謂加息事在必行，不過增加速度唔會好快，市場唔使咁擔心。達德利又預計，較長期的利率水準將「明顯低於」4.25厘的歷史平均水準，至於聯儲資産負債表上的4萬億美元資産，他又認為，在開始加息前，聯儲局不應該停止將到期證券的本金進行再投資，即係話聯儲局停止放水後亦唔應該馬上收縮資產負債表。聽完聯儲局官員的加息言論，投資者唔多唔少都會有點「熬底」，股市恐懼指標VIX指數亦一度彈跳8%至最高的13.3，收市回順至12.96。
市場另一焦點的阿里巴巴和搶閘上市的京東商城之間的惡鬥。
騰訊有份投資的京東搶先在本周在美國納斯特克市場上市，周三晚定價，估計市值230億美元，估計定價在每股16至18美元之間，若以中位數計集資16億美元，是今年第三大IPO。
京東和阿里巴巴打對台，從包銷商開始，京東的包銷是美國銀行、美林、UBS。阿里巴巴的包銷是高盛、大摩、德銀、JP摩根和Credit Suisse，一間銀行都無重覆，做到甲生意就唔好旨意做乙生意。
兩間公司都做電子商貿，但模式好唔同，京東似亞馬遜，由2004年開始做，自己做莊買貨去賣，有大倉儲和物流團隊。阿里巴巴等如做商場，由第三方商店賣嘢俾客。但講賺錢京東就無咁好賺啦，佢一年做110億美元生意，其中八成是毛利少的電器產品，如今只是剛打和，估計今年會賺錢。阿里巴巴一年只是做80億美元生意，但賺40億美元，有50%毛利率，生意好過京東好多。所以市場應該較歡迎阿里巴巴。
但阿里巴巴未上市住，佢在本月6日入紙申請上市，以佢咁大間公司計，一般要2、3月才批准，估計要到7月中至8月初，然後一兩星期招股上市，無咁快。所以要先睇睇京東呢枱戲唱成點。
陸羽仁
回應(0) 我想回應
陸羽仁 BLOG 舊文
