中環在線：為做善事再次碰頭港龍楊偉添 預告同周一嶽獻唱 - 李華華
嶽韻悠揚又唱歌港龍阿頭有份喎
平機會主席周一嶽因為一首《忘不了你》而獲得「官場技安」呢個綽號，但係佢真係越唱越大膽，不斷開金口。港龍航空行政總裁楊偉添(Patrick)噚日預告，佢同周一嶽將於下月中為慈善團體「健康快車」一個活動獻唱，不過唔係合唱，只係各有各唱。
■周一嶽近年出席不同場合，都慷慨開金口。
學唱歌各自拜師
Patrick喺太古集團工作超過30年，出名好叻唱歌，熱愛唱藝術歌曲，意大利、法文歌劇都係佢嘅拿手好戲，佢每年都會跟銀娛(027)主席呂志和位千金呂慧瑜等好友一齊舉辦一場演唱會，歌唱老師就係喺上海音樂學院退休之後，來港定居嘅倪承豐老師。
佢透露，今次並非首次與周一嶽喺同一個活動獻唱，對上一次，就係上月為「香港展能藝術會」一個活動唱歌，都係各有各唱。雖然周一嶽鍾意用歌劇腔唱歌，又有走去學歌劇，但係Patrick就好謙咁話，跟周一嶽只係普通朋友，大家都鍾意唱歌，又咁啱試過喺同一合場唱歌箒，周一嶽亦係跟另一位老師學唱歌。
Patrick打算喺下月中嘅活動唱英文歌《A love until the end of time》，至於周一嶽唱乜，佢就幫對方賣個關子。除咗《忘不了你》，周一嶽舊年都有喺不同場合公開唱過《Amazing Grace》、《Devoted to you》，睇嚟佢都係鍾意用歌劇腔唱歌，未必真係會唱首歌劇啩。
「健康快車」搵到周一嶽同Patrick演出，當然唔係簡單嘅組織，呢個係證監會前主席方正太太方黃吉雯喺1997年創辦嘅慈善眼科醫療項目，主要幫助內地窮困人士接受白內障手術。
李華華
mailto:LiWaWa@AppleDaily.com
■楊偉添最拿手唱意大利、法文嘅歌劇。
上一則: 樂香園 ：香港零售無運行 - 密西比
下一則: 中環在線：港龍夥新鬥記推中餐乳豬無份 - 李華華
中環在線 - 李華華 舊文
