自由難行
2014年05月28日
港股喺結算前繼續悶戰，大市喺缺乏成交下無乜上落，雖然個市悶到七彩，但呢啲時間，反而要小心大戶會唔會玩偷襲。
大戶托住 應跌不跌
本來，無人買貨，大戶要造低個市話咁易，但佢唔造低佢，反而仲有小小陰陰托住，咁就要提防佢反夾淡友，因為個市咁靜，大戶要造上一樣唔難。
五、六月份，有唔少公司派息除淨，本來有利推低指數，大戶喺呢個情況下無郁手，仲維持吓秩序，咁未必代表佢好睇好後市，唔排除佢會趁月尾夾一陣淡倉，食完沽空的股民，先至掉頭殺番落去。家入市資金咁少，大鱷可能雞胡都食吓，喺交投不足下，佢哋數飛仲容易，可以專門吼住散戶對着幹嚟食，所以就算個市悶，都要提高警覺，提防被人突然咬一啖。
恒指昨日收報22944點，微跌18點；國企指數收報10082點，跌43點，成交金額424億元。本來個市開始時內銀股跌得較多，但由於特首梁振英喺開行政會議前，承認在策略發展委員會上，曾徵詢若減少20%的自由行旅客的意見，令焦點去咗收租及零售股上，相關股份低開後持續低迷。收租股中，手持多個自由行至愛商場的九倉(004) 跌35%，報53.15元，表現是藍籌股最差；希慎(014) 跌幅相若，報35.5元；零售股莎莎(178) 挫3.8%；周大福(1929) 下滑3%。
今年首季，自由行人數已經放緩，相關概念股已經無運行，但佢哋表現應該仲未反映政府嘅政策，因為家振英話要減兩成人數。今年五． 一零售業喊晒口話生意難做，其實訪港旅客人數唔係真係跌得咁多，業界覺得淡咗係因為內地打貪，加上增長放緩，高消費的旅客減少咗。
有業界話五． 一外地旅客有回升，數人頭唔係跌咁多，但外地旅客消費力同內地人始終差啲，所以人均消費無可避免減少咗，但如果要減少兩成旅客，咁肯定會有進一步的衝擊，振英呢個建議，等如同零售界和業主倒米。
喺自由行政策下，旺區業主係最大贏家，尤其係龍頭商場，你想做生意要求佢租個位畀你，然後仲要同你拆數。零售商生意做得唔好，根本無機會入場；生意做得好，業主就食硬你一橛，商場業主等如有人幫你做生意，勤勤力力幫你搵食，仲承擔咗大部份經營風險，所以龍頭股好似九倉真係好鬼發，股價升完又升。不過，自由行日益難行下，呢個好日子相信至少短期內已經見咗頂。
九倉好日子過去
睇番九倉股價，過去一年最高造過74.2元，最低46.35元，跌咗37%；昨日收市53.15元，低位15%。佢家股息收益率3.2厘，數字上有吸引力，要留意係如果租金見頂回落，咁將來派息好難增長，而佢反彈咗咁多，就唔係咁易可以再大上嘞。
另外，周初急升後停牌的非凡中國(8032) 宣佈，按每份0.01元，配售最多7億份認股權證，集資淨額600萬元，用作一般營運資金，認股證行使價每股0.55元。非凡中國復牌後最高見0.66元，升逾22%，收報0.56元，升番4%。市場消息指，當中很大部份由鄭裕彤家族第三代認購。
陸羽仁
金融High Tea 舊文
