智取大市：炒完股要點事後煙 - 晉佳
■大戶同散戶都會keep住進步，懶惰同埋原地踏步嘅人就等於退步。資料圖片
大市悶到爆廠，波幅越來越窄，睇恒指2011年至今周線圖，亦見到呢個情況，在未見有重大消息前，相信大家要習慣呢個新常態。雖然晉佳炒股多年，但有好多缺點一直搣唔甩，加上懶惰兼自以為是，令自己一直冇諗方法去克服問題。直至最近感覺到自己出現樽頸，交易技巧欠缺進步，同時喺今年3、4月感覺到自己操盤經常做錯事，贏錢股太早沽、沽得曳，輸錢股又輸得冤枉，拖低回報，於是下定決心要成立一個交易嘅自我檢討制度，估唔喺制度成立一個月之後，就發現自己有嚴重交易錯誤。
先講錯誤，晉佳發現自己炒作細價股時，有多次太遲止蝕。參考番近兩個月交易，發現好多次買入細價股，買入後短時間內跌5%至10%，原來已經決定咗下跌方向，可以提早沽貨，點知遲遲未沽，甚至輸夠兩成或以上先識走，或許係自己過份相信自己嘅股票，最終正中大戶下懷。事後孔明，如果早啲識做檢討機制，單計呢兩個月回報應該能夠明顯改善。不過，正所謂遲到好過冇到，由於檢討制度可以帶嚟相當大嘅好處，所以決定同讀者們分享。
自我檢討搣甩陋習
好多人都會記錄低自己交易，睇嚇自己贏錢定輸錢。晉佳新機制唔係只記錄買賣賺蝕咁簡單，仲會按股份市值劃分。以自己為例，交易係以股份市值20億元以下、20億至100億元、100億至500億元、500億元以上去區分，睇嚇自己買細價股、中價股定係大價股回報較高。同時亦會喺每次入市後，寫低入市原因；沽出後，再寫低自己有犯咗乜嘢錯誤。最後仲要檢視自己買貨後半日至一日內股價走向，以及沽貨半日至一日後股價走向。就算係幾咁聰明、醒目嘅人，都會有其弱點，有啲弱點係可以透過經驗去改善，但有啲弱點係自己性格使然，甚至係與生俱來，想改都未必改到。因此，比較可行嘅做法，就係利用客觀統計，去計算邊啲位出現難以避免兼重複嘅犯錯，再用針對性方法去改善，錯誤避得過就避。
自己強弱點係乜，其實亦因人而異，晉佳嘅錯誤，唔代表會發生喺閣下身上。換言之，每個人買賣股票嘅方法，要因應自己個性、知識、強項去決定，過程中亦可以反覆試唔同招數。其實未必要等到樽頸位發生，先去正視自己嘅投資壞習慣，而係越早做越好。大戶同散戶都會keep住進步，懶惰同埋原地踏步嘅人就等於退步。恒常嘅檢討制度，除咗可以幫助自己進步得比市場快之外，亦可以監察住自己會唔會「回塘」，實在值得好好利用。
晉佳
本欄逢周三刊登
上一則: 一周三件：合富輝煌值博 - 錢雋
下一則: Follow Me：華瀚盈喜在望博反彈 - 高彰坡
智取大市 - 晉佳 舊文
