科技股反彈
2014/5/28 上午 09:47:58
網誌分類: 經濟
歐股創6年新高，振奮市場氣氛，美股延續長假期前升勢，朝早明顯抽高之後，在利好的經濟數據支撐下，在高位橫行到收市。美股連升四日，標普500指數及杜瓊斯運輸指數再創歷史新高。標普500指數升11點至1912點，杜指漲69點，收報16676點，納指大升51點，收市報4237點。羅素2000小型股指數大幅反彈，漲1.4%，跑贏大市。
美國經濟數靚仔，耐用品訂單意外增長0.8%，遠好過市場預期的下跌1.4%；另外，3月份Case-Shiller房價指數較去年同期上漲12.4%，係五個月來首次上漲，亦較預期的11.8%高；美國5月份消費者信心指數攀升至83點，略好過市場預期的82.7，以及上月的81.7。市場氣氛又去番好的一方。
歐美股市創新高，美國標普500指數及杜瓊斯運輸指數再創歷史新高，資金流入股市。金價重挫，紐約黃金期貨價格昨日急跌2%至每安士1265.5美元，創了3個多月以來新低。烏克蘭軍方表示已重新奪回東部城市頓涅茨克國際機場，報道指事件中有有50多名親俄武裝人員喪生。俄烏關係惡化，油價保持在每桶104美元高位，但對金價起唔到支援。CMC首席市場分析師Colin Cieszynski認為，投資者近期變得很樂觀，資金正在流入高風險資産，重挫黃金價格。從技術走勢睇，金價昨日已跌破六周三角形態，危危哋。
美國IPO市場，近日有復甦跡象。首先係納指於3月創出14年以來新高後，至4月中下挫了8%，上周大幅反彈，至昨日為止，已收復了一半失地；其次，包括一盤子60隻最近上市的IPO基金Renaissance Capital IPO fund由3月中至5月，當中有一半跌超過10%，上周亦強勁反彈；第三係上周有13家企業首日掛牌。上週五掛牌的Parsley Energy同SunEdison反應良好，分別大升30%及19.6%。惟一比較弱雞嘅係上週四上市嘅京東，上週五股價收20.1美元，雖然仍高過上市定價19美元，但已遠低過上市當日造出嘅22.8美元。
納指4月曾跌8%，如今跌少一半，對香港科技股都有啟示。你睇隻科技股王Google，昨日升2.4%收565.95美元，佢在今年2月4日升上高位604.83美元，到4月28日插到低位502.8美元，插咗102美元，若反彈跌幅一半係553.8美元，現價565.95美元，反彈唔止跌幅的50%，係彈咗跌幅的61%。
睇番騰訊，今年高位3月7日的129.2元(即一拆五前的646元)，低位5月9日的93元(未分拆前的465元)，差幅36.2元，現時113元，比低位反彈了20元，反彈了跌幅的55.2%，差過Google的61%彈幅，我又睇唔到騰訊本身有重大利淡因素，結論係騰訊短線仲有得去吓，會跟住美國科技股反彈。
陸羽仁
回應(2) 我想回應
陸羽仁 BLOG 舊文
