魚樂無窮：中滔三大賣點夠省鏡 - 唐牛
■中央將加快推進重大水利工程建設，徐湛滔任主席的中滔環保肯定可以分一杯羹。資料圖片
騰訊(700)首日降低門檻，結果上演一幕高開低收慘情戲，諗住搭順風車嘅戰友完美中伏，沽空比率仲衝上四成，淡友擺明要食大茶飯。另邊廂金山軟件(3888)業績冇人buy，埋單插水12%，中金打落水狗，喪劈目標價35%。兩大龍頭食咗厚多士霸氣盡失，唐牛短線睇好科網股嘅策略，俾人一盆冷水照頭淋。
水務股食正國策
不過，恒指依然企穩23000點收市，算係不幸中之大幸。總覺得近期大市示人以弱，引淡友開倉，然後先一舉挾上，始終二、三線股已經散曬，大戶冇理據要托住恒指出貨，話唔定世界盃開波之時，就係好友發動攻勢嘅日子！
繼續博大市有短炒機會，可向環保水務股中滔環保(1363)埋手，貪佢有齊三大優勢。第一，食正國策。國務院日前表示，要加快推進重大水利工程建設，今明兩年至十三五期間，共推172項重大水利工程，中滔環保肯定可以分一杯羹。
第二，股東增持。主席兼大股東徐湛滔，上月起連環增持公司股份，平均作價介乎4.178至4.333元，涉資約千萬元，雖然唔係大數目，但屬上市以來大股東首度出手增持，可視為見底訊號，有值博率。
第三，升呢摩指。MSCI今日收市前會換馬，中滔早前獲納入中國指數，今日應該有追蹤指數基金掃貨，買定有著數。近日悶市下於4至5元形成橫行區，一旦突破5元大關，有望啟動新一輪升浪！
唐牛
【壹錘定音 . 李慧玲】6月4日正式開咪!
收聽方法: 請留意【壹錘定音】facebook專頁！
https://www.facebook.com/hammerout.hk
上一則: 炒友Blog：上藥成功築底可低吸 - 邱古奇
下一則: 股場放大鏡：勝利管道硬淨有原因 - 歐陽風
魚樂無窮 - 唐牛 舊文
