撇帳潮
2014年05月30日
期指結算效應昨日顯現，港股期指結算日，恒生指數呈虎頭蛇尾走勢，一度倒跌過百點，最惹眼光嘅係重磅股騰訊(700) 開始拆細，每手500股降至100股，結果午後捱沽，全日收報109.8元，插了3%，成為表現最差藍籌股。
在內地股市下跌、美股回調下，港股險守兩萬三關，恒生指數收報23010點，跌69點；國企指數收報10185點，跌12點，成交金額583億元。正路結算完咗，大戶可能唔再托住個市，但由於好多人仲係睇淡，陸羽仁覺得比較穩陣嘅做法，係睇多一陣，唔好急急走去沽佢，以防個市再夾一夾，最怕萬一大戶真係咁蠱惑，你急沽豈不是被佢一夾就中？
前日兩幅官地拍賣揭盅，最多人講嘅唔係價錢賣得唔錯的啟德地，而係無乜人吼的白石角地。
呢幅地投標時小貓三四隻，有啲業界估會唔會出現流標呢？結果係政府求量不求價，不惜「賤賣」地皮，成交價24.1億元，樓面呎價3300元，中標係好耐無投過地的鷹君(041) 。
鷹君買地 行家應棍
睇番今次成交價，同樣印證到「應流不流」的睇法，因為同區地皮喺五年前拍過7000元外，家跌咗一半有多，而且成交價仲低過市場預期下限超過一成！專業測計行推算的價錢，應該係參考咗市價同地產商上次出價，下限價應可視作賣地底價的指標，鷹君出價破底咁多，政府都照賣，搞到滿地眼鏡碎，你話係咪「賤賣」先？
鷹君今次執咗平地，事前有無諗過，真係要問管理層先知，因為佢過去主要都係做商業樓宇同酒店，起碼十年無起過住宅出售。今次以破底價賣地下忽然中標，鷹君股價收市就升咗2.76%。
不過，瑞信估計，鷹君投資該項目成本為56億元，相當於每股9元，集團持有每股淨現金10.6元，料將耗盡集團淨現金，相信未來不會作出大型收購土地及派特別息。
該行認為，由於鷹君短期缺乏催化劑，建議換馬至冠君產業(2778) ，因可直接受惠中環寫字樓市場復甦。有中環茶友口痕講笑，執咗平地反被大行唱淡，鷹君股東唔知是喜是愁之餘，但好肯定其他地產商就中招「應棍」。
長實升皆因無買地？
茶友話，白石角呢幅地賣到屯門價，說明政策唔再視土地為珍貴資源，推售「無底價」，咁搞法地產商買地當然諗縮數，平平哋入標博買平嘢，尤其供應多的新界地仲明顯，咁樣可以搞到地價全面回落，下一個問題係先前投咗地嘅發展商，土地儲備使唔使撇帳先？聽住佢咁問，就明白地產股表現，點解好耐無買地的長實(001) 昨日升咗2.16%，再創新高之餘，仲做埋表現最叻藍籌。
本來，買咗地撇帳只係數字遊戲，今年撇完如果他日升番，將來可能估番高，除非公司借咗好多錢影響融資成本，否則影響唔係好大。
不過，如果遇着個市唔好，咁股價就可能會受壓，諗到呢度，想買地產股的投資者，就要留意邊間公司，喺呢幾年買咗好多地，買佢哋公司股票，要先諗埋呢個因素嘞。
陸羽仁
金融High Tea 舊文
