金山風暴
2014/5/30 上午 09:34:56
網誌分類: 經濟
金山軟體(03888)昨日大插，拖累整個科網板塊唔見咗300幾億市值。金山軟件首季業績並不理想，不計一次收益後業績倒退，差過市場預期，中金昨日狂劈金山目標價35%，令金山大跌11.6%。
現時市場上對金山有兩派意見，一種意見認為金山早前已警告投資者，傳統業務增長會放緩，只是大家唔信，而時佢進軍手機遊戲業，仍可睇好。但另一種意見認為，金山軟件的收入接近一半來自安全軟件獵豹，傳統網頁遊戲業務的貢獻有限，手遊業務又未上來，青黃不接，現在歷史市盈率30.8倍很貴。
我就認為金山大跌的理由簡單，隻股升咗咁多，歷史市盈率30.8倍，預測2014年市盈率18.3倍，即係話券商估計佢今年盈利大升，如今一見季度業績唔對辦，一調低盈利預測，跟手就下調目標價。
小米老闆雷軍持有金山約27%，佢旗下小米手機今年目標銷售量6,000萬部，金山有雷軍概念，之前炒咗一轉金山透過小米機打入手遊業，但炒完好快降溫。這就是炒熱股的風險。
另一方面，美股升勢真係沒法擋，連升四日後，上日竭一竭，昨日美國公布首季度GDP萎縮1%，朝早挫一挫，由升轉跌，當好多人以為美股會出現較大調整。點知好快就止跌回升，反覆向上，以接近全日最高位收市。標準普爾500指數再創歷史新高，升收市升10點至1920點，杜指漲66點，收報16699點；納指升23點至4248點。
美國昨日公布今年第一季GDP修正報告，經濟增長以年計較上季收縮1%，為近3年來經濟首次出現萎縮。分析師指，導致經濟經濟萎縮的原因好多，比較重要嘅係經濟活動遭到嚴冬的重大衝擊，其次係庫存增加的速度大幅放緩，以及貿易赤字的估計值高於早前的預期，另外，企業針對非住宅項目的開支鋭減，降幅明顯超出市場預期。不過，目前有跡象顯示經濟已開始反彈。
大市跌唔落去嘅另一個原因係勞工部公布，最近一周嘅首次申請失業救濟人數減少了2.7萬人，至30萬人，係2009年美國經濟結束衰退以來第二個最低，而市場預期係32.2萬人。過去一個月，首次申請失業救濟人數平均下降1.125萬人至31.15萬人，係2007年8月以來最低水平。另外，據全美地産經紀商協會報告，美國四月份二手房簽約銷量增長0.4%，已連續第二個月增長。
值得注意嘅係美股美債雖然不斷向上，但市場的波動性亦唔大，交投量都唔得，出現乾升現象。例如有分析統計35年以來的美國10年期債息波動率，每三個月的波動率平均為0.85%，截至今年5月的三個月波動率卻只有0.2%，係1987年4月以來最細，當時為0.22%。股市恐慌指標VIX指數亦係非常之低，低過10年均值近40%。另外，外匯交易量較去年跌45%，抵押貸款支持債券交易量下跌20%，公司債交易量跌近15%。花旗和摩根大通昨日齊發警告，指第二季交易部門營收將重挫。
高盛總裁科恩昨日解釋，全球量化寬鬆和低利率，造成市場現時的低波動性。而低波動性壓抑了交易量、縮買賣價差、降風險喜好、打擊投資者獲得超額收益的能力。投資回報沒有了吸引力，投資者自然提唔起興趣落場，甚至抽起資金在場外觀望觀望啦。
陸羽仁
回應(10) 我想回應
陸羽仁 BLOG 舊文
