一周三件：新昌營造超值 - 錢雋
■新昌營造隨住股權清晰化，兼引入超級大孖沙天物，筆者認為現價超值。
新昌營造(404)最近三年，長期橫行在1蚊的水平，隨住股權清晰化，兼引入超級大孖沙，應該可以打破呢個悶局，新昌等海闊天空。
新昌原先股權，由掌舵王英偉同投資者馬炯揸一板，觀瀾湖嘅主席朱樹豪(已故)另揸一板13%，兩邊權益相差冇幾。隨住朱先生嘅離世，當時市場憧憬新昌成為觀瀾湖嘅殼，已經幻滅咗，但朱氏家族手上嘅貨，唔係細，新昌大橫行。
新昌剛啱新鮮熱辣公佈，朱氏家族甩咗手貨，賣咗畀天津物產集團(以下簡稱天物)，連埋天物本身揸住新昌4.8%股權，總權益上到接近18%，成為新昌嘅大股東。而後邊天物好巴閉，份屬天津市最大國有生產資料流通企業，總資產挨近1,000億銀人仔，兼係第一家天津市企業，打入2013年財富世界500強。諗到係，新昌股權理順咗，加埋由靚態股東變咗大孖沙股東，好有遐想。
睇番本業，新昌到上年尾，建造業合約高達245億銀，嚟緊日子，仲有橫琴大興土木嘅因素，呢瓣繼續好掂。又食住城鎮化，新昌計劃今年下半年推出嘅遼寧鐵嶺「星悅南岸」，應該係有運行。以項目總樓面3,300萬平方呎，每方呎係咁意增值100蚊咁大把，已經額外增值/獲利33億銀。
博翻半番見1.63元
新昌呢期計劃收購佛山項目，部份代價係以發行可換股優先股支付，所講緊最多可以兌換新昌股數，達到67.9億股，每股兌換價1.2元。睇到係大製作同時，新昌現價(1.06元)仲係比兌換價潛水。
買新昌，先博上返上年頭高位1.63元，講緊要翻半番，連重秤後，目標價PB，仲有0.6倍；又相對佛山項目，計劃所發優先股兌換價，亦只係升得36%咁大把，大雞點會食細米？
錢雋
細價股專家
本欄逢周二、三、五刊出
【壹錘定音 . 李慧玲】6月4日正式開咪!
收聽方法: 請留意【壹錘定音】facebook專頁！
https://www.facebook.com/hammerout.hk
上一則: 投資學堂：強迫金激死人 - 譚紹興
下一則: 滙海探戈：歐美債孳息下滑添亂 - 奇兵
一周三件 - 錢雋 舊文
