異動空間：五窮月超人氣股 - 魏力
中國家居(692)復牌狂彈80%，猶如漆黑中的一點曙光，市值11億銀嘅股票，單日成交近5億銀；27.66億已發行股本，上周五(2日)交易股數14.29億股，換手比率51.7%，直情可媲美新股掛牌日，超人氣股當之無愧！
剛洗完倉嘅中國家居，何解可吸引一眾炒家、散戶瘋炒？原因好簡單，就係個市根本冇嘢炒，幾百個餓鬼見到一塊發咗黴嘅光酥餅，由於太肚餓關係，已經唔理塊餅仲食唔食得，即時用盡最後一口氣，飛身撲向塊餅，希望可以搶到一角充飢，在瘋狂追捧下，股價點會唔爆到七彩？
5月份「投資王擂台賽」首日賽事史無前例出現一個奇景──首20名散戶清一色炒中國家居，買得大贏得多，首名單日回報56%，佢於低位0.255元掃貨，又於高位0.405元靚沽部份，高手！當然，實錢落場炒，邊個夠膽瞓身掃呢隻洗倉股？如此高風險股份，魏力絕不建議沾手，真係買咗的話，有糊要食，唔好大貪。
資金避去公用股，新創建(659)接近四厘息，股價近月逆市超強勢，值得留意。該股以小圓底炒上，上日大升5.3%，MACD再形成雙牛，成交配合，破位再上機會高。
魏力
http://www.facebook.com/2012jason
上一則: 何車500：中交建可追落後 - 何車
下一則: 青心直說：如何防春江鴨 - 胡孟青
異動空間 - 魏力 舊文
