股場放大鏡：內房水泥有排無運行 - 歐陽風
■潘軍任主席的花樣年近期股價長跌長有，水泥、內房股應該有排無運行。資料圖片
隨著內地多個城市傳聞放寬限購，又或者以戶籍吸引鄉鎮資金落戶一二線城市，事實證明內地房地產商資金鏈已經相當緊張，內地樓市或已到了非救不可的一個轉角位。內地有別於香港，新盤售出第一批後，第二批唔可以減價，否則前一批買家會來找發展商算賬，民眾打砸售樓處事件時有所聞。
不過，第二批樓盤唔減價賣唔去，就算樓價頂住唔跌，發展商無資金回籠亦係大鑊。以內房商的高槓桿高負債，一旦資金鏈斷裂，好快就會火燒連環船，由銀行壞賬、債券(或理財產品)違約到發展項目爛尾，每一個後果都會引發金融動盪，不可不察。
內房商今次大鑊，連大行都睇得到，連帶水泥行業都受衝擊。大摩日前發表報告指，內房發展商將在2014到2015年去庫存，令新屋動工和買地活動都大幅減少，勢將衝擊水泥行業。過往12個月股價最強的海螺水泥(914)及華潤水泥(1313)影響最大，除了盈利預測被下調，行業邊際利潤亦已見行業頂峰，將出現double downgrade。
花樣年長跌長有
該行預測內房商今年動工新項目將減少15%，而賣地收益減少亦將衝擊地方政府收入，令基建開支亦將減少，預測今年水泥需求增長由5%調低至2.8%。上周五大部份水泥股表現乏力，中國建材(3323)更加逆市陰燭低收，看來情況不妙。更大鑊的可能是一眾內房，花樣年(1777)近期股價長跌長有，上周五大陰燭跌穿近兩年橫行區低位支持，事不尋常，水泥、內房股應該有排無運行。
歐陽風
上一則: 魚樂無窮：資金潛伏房託有玄機 - 唐牛
下一則: 睇嚇鮮：中國大媽教買金 - C+B
股場放大鏡 - 歐陽風 舊文
